ქართველ სუმოისტ ტოჩინოშინს, იგივე ლევან გორგაძეს ოძეკის ტიტული ოფიციალურად მიანიჭეს. ამის შესახებ ინფორმაციას უცხოური გამოცემა nhk - Japan ავრცელებს. ლევან გორგაძე მესამე ევროპელი და პირველი ქართველია, ვისაც ეს წოდება მიენიჭა. ეს ტიტული სპორტის ამ სახეობაში მნიშვნელობით მეორე წოდებაა.

იაპონიის სუმოს ასოციაციამ ტოჩინოშინისთვის რანგის მომატების შესახებ გადაწყვეტილება რამდენიმედღიანი მსჯელობის შემდეგ მიიღო. ოფიციალურ ცერემონიას თავად სუმოისტი და მისი მწვრთნელი, კასუგანო ესწრებოდნენ.

ნაცუ ბაშოს ბოლო, მე-15 დღე ქართველმა სუმოისტმა ლევან გორგაძემ (ტოჩინოშინი) გამარჯვებით დაასრულა.

მას 13 მოგება მოუგროვდა. იგი ნაცუ ბაშოს სეკივაკეს რანგში შეხვდა, თუმცა მომდევნო ბაშოზე იგი ოძეკის სტატუსით წარსდგება.

ოძეკის ტიტულის მფლობელი ევროპელები ასევე არიან ბულგარელი კოტოოშუ და ესტონელი ბარუტო.