საქართველოს საგარეო საქმეთა სამინისტრომ სირიასთან დიპლომატიური ურთიერთობის გაწყვეტის შესახებ გადაწყვეტილება საქართველოში აკრედიტებულ ელჩების კორპუსს გააცნო. ელჩებმა შეხვედრის დასრულების შემდეგ, მედიასთან კომენტარები გააკეთეს, მათ დაგმეს სირიის მიერ საქართველოს ოკუპირებული ტერიტორიების აღიარება და მხარი დაუჭირეს ქვეყნის სუვერენიტეტსა და ტერიტორიულ მთლიანობას საერთაშორისო საზღვრებში.

საფრანგეთის ელჩის საქართველოში პასკალ მონიეს განცხადებით, საფრანგეთი მხარს უწერს საქართველოს სუვერენიტეტსა და ტერიტორიულ მთლიანობას, მის საერთაშორისოდ აღიარებულ საზღვრებში.

"საფრანგეთი ყოველთვის დგას ამ პოზიციაზე. ჩვენთვის არაფერს ნიშნავს სირიის მიერ საქართველოს ოკუპირებული ტერიტორიების აღიარება, ამ ნაბიჯს საერთო არაფერი აქვს საერთაშორისო სამართლის ნორმებთან", - განაცხადა პასკალ მონიემ.

ევროკავშირის ელჩის საქართველოში იანოშ ჰერმანის განცხადებით, სირიის მიერ აფხაზეთისა და სამხრეთ ოსეთის აღიარება, ეწინააღმდეგება საერთაშორისო სამართალს და ევროკავშირის მტკიცე და გრძელვადიან პოლიტიკას არაღიარების შესახებ.

"ევროკავშირი დგას საქართველოს გვერდით. ჩვენ ყოველთვის ვუჭერდით და დავუჭერთ მხარს საქართველოს სუვერენიტეტსა და ტერიტორიულ მთლიანობას. ეს არის ჩვენი უმთავრესი პრინციპი", - განაცხადა იანოშ ჰერმანმა.

გერმანიის საგანგებო და სრულუფლებიანი ელჩის საქართველოში ჰაიკე რენატე პაიჩის განცხადებით, გერმანია გმობს სირიის მთავრობის გადაწყვეტილებას.

"გერმანია და ჩვენი ყველა საერთაშორისო პარტნიორი მხარს უჭერს საქართველო ტერიტორიულ მთლიანობას და სუვერენიტეტს", - განაცხადა ელჩმა.

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. საქართველომ კი პასუხად სირიასთან დიპლომატიური ურთიერთობა გაწყვიტა.

სირიის პრეზიდენტს, ბაშარ ალ-ასადს, სამოქალაქო ომის პერიოდში, რუსეთი ყოველთვის მხარს უჭერდა. პუტინი სირიის ომში კიდევ უფრო აქტიურად მაშინ ჩაერთო, როცა ასადი სამხედრო და ეკონომიკური კუთხით დასუსტდა. რუსული ავია ბომბები ხვდება ისლამური სახელმწიფოს მებრძოლებს, თავდასხმები ასევე ხორციელდება დასავლეთის მიერ მხარდაჭერილ სირიის თავისუფალ არმიასა და მშვიდობიან მოქალაქეებს.

სამხრეთ ოსეთის და აფხაზეთის დე-ფაქტო რესპუბლიკა მანამდე აღიარა რუსეთმა, ნიკარაგუამ, ნაურუმ და ვენესუალამ.