თბილისის მერიაში არ ადასტურებენ, რომ ავტობუსისა და მეტროს საფასური 80 თეთრამდე გაიზრდება. უწყების პრესსამსახურის ცნობით, ეს საკითხი არ განხილულა და არც განიხილება.

გაზეთ რეზონანსის ცნობით, ტარიფის ზრდის მიზეზი ერთიანი საბარათე სისტემის შემოღებაა, რომელიც მიკროავტობუსებს, მეტროს და ავტობუსებს გააერთიანებს. მერია არც აღნიშნულს ადასტურებს და განმარტავს, რომ ერთიანი გადახდის სისტემა ტარიფის ზრდას არ უკავშირდება:

"ეს უბრალოდ ჟურნალისტის ინტერპრეტაციაა".

უწყებაში ადასტურებენ, რომ ინტეგრირებული ავტომატიზებული მგზავრობის საფასურის შეგროვების სისტემა შემუშავების პროცესშია:

"მარშრუტების რეორგანიზაციის გეგმაზე სისტრას კვლევა მიმდინარეობს. ინტეგრირებული ავტომატიზებული მგზავრობის საფასურის შეგროვების სისტემა სწორედ ამის ნაწილია. მათ ჯერ მკაფიოდ არ უთქვამთ, თუ რას შემოგვთავაზებენ".