საპარლამენტო უმრავლესობის დეპუტატის, პარლამენტის ვიცე-სპიკერის გია ვოლსკის განცხადებით, რუსეთმა აიძულა სირია, რომ აფხაზეთისა და სამხრეთ ოსეთის ოკუპირებული ტერიტორიები დამოუკიდებელ რესპუბლიკებად გამოეცხადებინა.

გია ვოლსკის თქმით, ხელისუფლებისთვის სირიის ეს ნაბიჯი მოსალოდნელი იყო.

"გამორიცხულია, რომ ეს ნაბიჯი სირიას არ გადაედგა. ჩვენ ველოდით, რომ სირიის რეჟიმი ისევე როგორც ვენესუელას რეჟიმი ამ ნაბიჯს გადადგამდა. სირია კიდევ უფრო მეტადაა დამოკიდებული რუსეთზე და მასთან განსაკუთრებული ურთიერთობა აქვს", - განაცხადა გია ვოლსკიმ On.ge-სთან საუბრისას.

დეპუტატი ფიქრობს, რომ სირიის პოლიტიკურმა ელიტამ ნაკლებად იცის სად მდებარეობს აფხაზეთი და ოსეთი, საიდან წარმოიშვა, კონფლიქტი და რა ხასიათი აქვს.

"ეს არის რუსეთის თემა. არ მგონია არსებობდეს კიდევ ქვეყანა, რომელიც გაიმეორებს ამ პოლიტიკურად ანგაჟირებულ გადაწყვეტილებას", - განაცხადა გია ვოლსკიმ.

დეპუტატის თქმით, რუსეთი თავს უხერხულ მდგომარეობაში იგდებს და ისედაც შელახულ ავტორიტეტს უფრო მეტად ილახავს, როცა ქვეყნებს აიძულებს ცნონ აფხაზეთისა და სამხრეთ ოსეთის დამოუკიდებლობა.

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. ამის შესახებ ინფორმაცია სირიის საგარეო საქმეთა სამინსიტროს ვებგვერდზეა გამოქვეყნებული. განცხადებაში წერია, რომ აღიარების მიზეზი სირიის წინააღმდეგ მიმართული ტერორისტული აგრესიაა. უწყების განცხადებით, აღიარება დიპლომატიური ურთიერთობების, საელჩოების დონეზე დამყარდება.

აღიარების შესახებ ინფორმაციას ავრცელებენ სამხრეთ ოსეთის და აფხაზეთის დე-ფაქტო რესპუბლიკებიც.

სამხრეთ ოსეთის და აფხაზეთის დე-ფაქტო რესპუბლიკა უკვე აღიარა რუსეთმა, ნიკარაგუამ, ნაურუმ და ვენესუალამ.