ახალგაზრდა იურისტთა ასოციაციის თავმჯდომარეს, სულხან სალაძეს მიაჩნია, რომ სამინისტროს ყველა თანამშრომლისთვის აქციებში მონაწილეობის აკრძალვა არასწორია. ასე გამოეხმაურა ის "შეკრებებისა და მანიფესტაციების შესახებ" კანონპროექტს. ამის შესახებ მან On.ge-სთან საუბარში განაცხადა.

ახალი კანონპროექტით, ფართოვდება იმ პირთა წრე (თავდაცვის ძალების ან სახელმწიფო ან საზოგადოებრივი უსაფრთხოების დაცვაზე პასუხისმგებელი ორგანოს მოსამსახურე), რომელთაც მშვიდობიანი შეკრების უფლება შეიძლება აეკრძალოს.

სალაძე განმარტავს, რომ მათი ვალდებულებები და მათი მხრიდან ვალდებულებების შეუსრულება ერთი და იგივე ტიპის შედეგებს არ იწვევს:

"როდესაც ისეთ ცვლილებაზეა საუბარი, რაც შეკრებასა და მანიფესტაციას უკავშრდება, ფართო დისკუსიებისა და განხილვების შედეგად უნდა მიიღონ. პლენარულ სხდომაზე, განსაკუთრებით საკომიტეტოზე, ყველა დაინტერესებულ პირს შეუძლია წარადგინოს მოსაზრება. ბუნებრივია, ამ ქვეყანაში არის დაწესებულებები, სადაც კრიტიკულად მნიშვნელოვანია, რომ მათი საქმიანობა არ ფერხდებოდეს".

ცვლილებების მიხედვით, თავდაცვის ძალების ან სახელმწიფო ან საზოგადოებრივი უსაფრთხოების დაცვაზე პასუხისმგებელი ორგანოს მოსამსახურედ ითვლება პირი, რომელიც არის:

  • პროკურატურის მუშაკი;
  • საქართველოს შინაგან საქმეთა სამინისტროს მოსამსახურე;
  • საქართველოს ფინანსთა სამინისტროს საგამოძიებო სამსახურის თანამშრომელი;
  • საქართველოს იუსტიციის სამინისტროს გენერალური ინსპექციის თანამშრომელი;
  • საქართველოს თავდაცვის ძალების მოსამსახურე;
  • საქართველოს სახელმწიფო უსაფრთხოების სამსახურის მოსამსახურე;
  • საქართველოს დაზვერვის სამსახურის მოსამსახურე;
  • საქართველოს სახელმწიფო დაცვის სპეციალური სამსახურის თანამშრომელი;
  • საქართველოს სასჯელაღსრულებისა და პრობაციის სამინისტროს სპეციალური პენიტენციური სამსახურის მოსამსახურე;
  • საქართველოს სასჯელაღსრულებისა და პრობაციის სამინისტროს საგამოძიებო
    დეპარტამენტის თანამშრომელი;
  • საგანგებო სიტუაციების მართვის სამსახურის მოსამსახურე;
  • საქართველოს გარემოსა და სოფლის მეურნეობის სამინისტროს გარემოზე ზედამხედველობის დეპარტამენტის მოსამსახურე.