ქართული დიასპორის დღისადმი მიძღვნილ ფორუმზე საქართველოს პრემიერ-მინისტრმა, გიორგი კვირიკაშვილმა განაცხადა, რომ ხელისუფებამ, საგარეო პოლიტიკის მიმართულებით ბოლო სამ წელში განხორციელებულ მიღწევებზე, უფრო მეტი უნდა ისაუბროს.

პრემიერმა, სიტყვით გამოსვლის დროს, ვიზალიბერალიზაციის მიღების შემდგომ ბრიუსელში, ევროკომისარის სიტყვები გაიხსენა, რომლის მიხედვითაც "რომ არა საბჭოთა ოკუპაცია, საქართველოს ევროკავშირის დამფუძნებელ მამებს შორის იქნებოდა".

"ეს განცხადება მნიშვნელოვანია და გუშინდელმა დღემ წარმოაჩინა საქართველოს ევროპული, დემოკრატიული ფასეულობების მნიშვნელობა მსოფლიოს მაშტაბით. ჩვენ უფრო მეტი უნდა ვისაუბროთ სამი წლის განმავლობაში გაკეთებულ ტიტანურ საქმე და ჩვენი ისტორიის ამ სამწლიან მონაკვეთს უფრო დიდი მნიშვნელობა უნდა მიენიჭოს", - განაცხადა კვირიკაშვილმა.

პრემიერის თქმით, ის უსურვებს საქართველოს გახდეს ევროპის სრულუფლებიანი ოჯახის წევრი, როგორც ამას საქართველოს პირველი რესპუბლიკის დამფუძნებელი მამები ოცნებოდნენ.

თბილისში, ქართული დიასპორის დღისადმი მიძღვნილი ფორუმი ძლიერი დიასპორა ერთიანი საქართველოსთვის გაიხსნა. ფორუმი საქართველოს პირველი დემოკრატიული რესპუბლიკის გამოცხადებიდან 100 წლის იუბილეს ეძღვნება.