შინაგან საქმეთა სამინისტროს განცხადებით, თბილისში ნარკოტიკული საშუალებების 1 709 სამალავს მიაგნეს. უწყებაში აღნიშნავენ, რომ მათ მიერ ნარკოდანაშაულისთვის დაკავებული პირი ამ სამალავებიდან ყიდდა ნარკოტიკულ საშუალებას.

შსს-მ ნარკოდანაშაულისთვის რუსეთის ერთი მოქალაქე დააკავა. უწყებაში აცხადებენ, რომ ჯამში 180 შეკვრად დაფასოებული ნარკოტიკული საშუალებები ამ პირის საცხოვრებელი სახლიდან და თბილისის ზღვასთან მდებარე სამალავიდან ამოიღეს.

"გამოძიებით დადგინდა, რომ დაკავებული ნარკოტიკულ საშუალებებს ინტერნეტისა და მობილური აპლიკაციების საშუალებით ასაღებდა", - აცხადებენ შსს-ში და დასძენენ, რომ დაკავებული პირი ბოლო სამი თვის განმავლობაში საქართველოში ნარკორეალიზაციისთვის ჩამოდიოდა.

საქმეზე გამოძიება სისხლის სამართლის კოდექსის 260-ე მუხლით მიმდინარეობს. ამ მუხლით, ნარკოტიკული საშუალების დამზადება, წარმოება, შეძენა, შენახვა, გადაზიდვა ან გადაგზავნა ისჯება თავისუფლების აღკვეთით ექვს წლამდე ვადით.