შავი ზღვის ყველაზე მასშტაბური ჯაზფესტივალი მსმენელს უბრუნდება. მის ლორენ ჰილის შოუს შემდეგ, რომელმაც სრული ანშლაგით ჩაიარა, დღეს, 21 ივლისს, ბათუმის ჩოგბურთის კორტებზე მორიგ ანშლაგს ელოდებიან.

ელექტრონული და როკ–მუსიკის მოყვარულების წინაშე დღეს ცნობილი ინგლისურენოვანი ბენდი The prodigy წარსდგება. დღევანდელი კონცერტის ბილეთები სრულიად გაიყიდა.

პროდიჯი 1990 წელს ჩამოყალიბდა და მან მსოფლიო აღიარება გამოჩენისთანავე მოიპოვა. ჯგუფი ითვლება ბიგ-ბიტის პიონერად, რომელმაც 1990-იან 2000-იან წლებში უდიდეს წარმატებას მიაღწია. კარიერის განმავლობაში მიღებული აქვს მრავალი მუსიკალური ჯილდო, ჯგუფი ორჯერ იყო ნომინირებული გრემიზე. ჯგუფის მუსიკალურ რეპერტუარში სხვადასხვა ჟანრის მუსიკაა, მათ შორის, ელექტრონული და როკ-მუსიკა.

რიგით მე–10, საიუბილეო ჯაზ–ფესტივალი პროექტ Chek in Georgia-ს ფარგლებში ტარდება. ფესტივალმა სტარტი 15 ივლის აიღო. მსმენელის წინაშე უკვე წარსდგა ქვინსი ჯონსი თავისი ახალი პროექტით, მაილს ელექტრიკ ბენდი ლეგენდარული მუსიკის ახალი სიცოცხლით და მის ლორენ ჰილი დაუვიწყარი შოუ–პროგრამით.

ლორენ ჰილის შთამბეჭდავი შოუს შემდეგ ფესტივალმა სამდღიანი შესვენება აიღო. ამ დღეებში ბათუმის ჩოგბურთის კორტებზე კონცერტები არ გამართულა, მაგრამ ჯაზის მოყვარულთათვის სხვადასხვა სახის შოუები ჩატარდა ქალაქის ქუჩებში. მათ შორის ბათუმის კოლონადებთან, სადაც ბათუმის ბიგ–ბენდის კონცერტი გაიმართა, რომელსაც ფესტივალის მონაწილე, 27 გრემის მფლობელი ლეგენდარული ქვინსი ჯონსი დაესწრო.

ახლა კი მსმენელის წინაშე ცნობილი, ელექტრონული მუსიკის შემსრულებელი ბენდი პროდიჯი წარდგება. დეტალებს და მაყურებლის შთაბეჭდილებებს კონცერტის შემდეგ ჩვენს რეპორტაჟში იხილავთ.