საქართველოს პრეზიდენტმა, გიორგი მარგველაშვილმა, 143 მსჯავრდებული შეიწყალა. პრეზიდენტის შეწყალების კომისიის თავმჯდომარის, ზვიად ქორიძის განცხადებით, 84 მსჯავრდებული დღესვე დატოვებს საპატიმრო დაწესებულებას, 59-ს კი - სასჯელი შეუმცირდა.

ქორიძემ ძალადობრივი დანაშაულისთვის მსჯავრდებულების შეწყალებაზეც ისაუბრა:

"გასამართლებული მსჯავრდებულების საქმეების განხილვაზე მორატორიუმია, სწორედ ამ მორატორიუმის ფარგლებში კომისიამ გადადო 216 მსჯავრდებულის საქმე. ისინი არიან გასამართლებულები ძალადობრივ დანაშაულებზე, სიცოცხლისა და ჯანმრთელობის წინააღმდეგ მიმართულ დანაშაულებზე, ძარცვაზე, ყაჩაღობაზე. მათ საქმეებს კომისია აუცილებლად განიხილავს"- განაცხადა ზვიად ქორიძემ.

16 აპრილს პრეზიდენტმა, გიორგი მარგველაშვილმა განაცხადა, რომ შეწყალების კომისია ძალადობრივი დანაშაულის საქმეებზე შეწყალების აქტების გამოცემას დროებით წყვეტს.

მისივე განმარტებით, შეწყალება შეწყდება მანამ, სანამ კონსულტაციებს არ გაივლიან შეწყალების პროცესის "ყველა აქტორთან" როგორც სახელმწიფო უწყებებთან, ისე ძალადობაზე მომუშავე ჯგუფებთან.

პრეზიდენტმა გადაწყვეტილება მას შემდეგ მიიღო, რაც 13 აპრილს ბარნოვის ქუჩაზე ყოფილმა მამინაცვალმა, 25 წლის ქალს ყელი გამოჭა. ბაქრაძე 2015 წლიდან, ყოფილ ცოლზე ძალადობის გამო იხდიდა სასჯელს. ის 2017 წელს პრეზიდენტის შეწყალების საფუძველზე გაათავისუფლეს. მანამდე, ე.წ. უდოს კომისიამ პირობით ვადაზე ადრე გათავისუფლებზე ბაქრაძე ექვსჯერვე უთხრა უარი.