11 მაისიდან 11 დღეში ერეკლე დეისაძემ ახალი სიმღერა გამოუშვა. სიმღერა, სახელად "მე ვცეკვავ", კაფე გალერისა და ბასიანის დახურვასა და პოლიციის ქმედებებს ეხმიანება.

"ვცეკვავ ხვალიდნდელი დღისთვის, უკეთესი მომავლისთვის, ჩვენი თავისუფლებისთვის ვცეკვავ", - მღერის დეისაძე.

სიმღერას ქართველი მუსიკოსი პარლამენტის შენობის წინ და 9 აპრილის მემორიალზე ასრულებს, კლიპში კი სპეცოპერაციისა და აქციების კადრებს ვხედავთ.

11 მაისის ღამეს და 12-ის გამთენიისას, თბილისის ღამის კლუბებში ბასიანსა და გალერიში სპეცოპერაცია ერთდროულად დაიწყო. კლუბები დაატოვებინეს ყველა სტუმარს ისე, რომ პირადი ნივთების გამოტანის საშუალებაც არ მისცეს.

სამართალდამცავები, რომლებიც სპეცოპერაციაში იყვნენ ჩართულები, მოქალაქეებს არ უხსნიდნენ, რა მიზეზით დაატოვებინეს კლუბები და არ აძლევდნენ იქ შესვლის საშუალებას. იმავე ინფორმაციულ ვაკუუმში იყო მედიაც. შინაგან საქმეთა სამინისტროს პრესსამსახური მხოლოდ საგამოძიებო მოქმედებების შესახებ ავრცელებდა ინფორმაციას.

სპეცოპერაციიდან 48 საათის განმავლობაში, აქციები იმართებოდა თბილისში, მათი დასრულების შემდეგ, შს მინისტრმა, გიორგი გახარიამ განაცხადა: "70 კაცისთვის გართობაში ხელის შეშლაზე უფრო მნიშვნელოვანი იყო მიღებული სარგებელი".

კაფე გალერის დაკეტვის შემდეგ, ლუქი დღეს მოეხსნა. რაც შეეხება ბასიანს, უცნობია, როდის გაიხსნება კლუბი, რომელიც უამრავი ახალგაზრდის თავშეყრის ადგილია. 27 მაისს ბასიანი საპროტესტო აქციას გამართავს