პარლამენტის პლენარულ სხდომაზე შინაგან საქმეთა მინისტრის მოხსენება დასრულდა. დეპუტატების შეფასებებისა და დებატების შემდეგ გიორგი გახარიამ პარლამენტარებს დასკვნითი სიტყვით მიმართა.

მინისტრის სიტყვის მთავარი ადრესატები პოლიციელები იყვნენ. გიორგი გახარიას განცხადებით, პოლიცია არ არის არც ერთი პარტიის და ის საზოგადოებისაა.

"კეთილსინდისიერება და ეფექტურობა არის ის კრიტერიუმები, რომლებიც მოგვცემს საშუალებას აღვადგინოთ ნდობის ის მაღალი ხარისხი, რომლის გარეშე ეფექტური ბრძოლა კრიმინალთან იქნება შეუძლებელი. ეს არის პრინციპულად მნიშვნელოვანი", - განაცხადა შს მინისტრმა.

გიორგი გახარიას თქმით, შსს-ს კარგად ესმის, რომ უკომპრომისო ბრძოლა კრიმინალთან და მოქალაქეებზე ზრუნვა მათი ძირითადი მიზანია.

"პოლიცია არ ეკუთვნის არც ერთ პარტიას, პოლიცია ეკუთვნის ქვეყანას და ჩვენი მისია, ჩვენი სისტემური განახლების მთავარი მიზანი გახლავთ ის რომ, პოლიცია გახდეს უფრო ეფექტური და უფრო კეთილსინდისიერი", - განაცხადა შინაგან საქმეთა მინისტრმა გიორგი გახარიამ.

შს მინისტრმა პარლამენტში სამ თემაზე ისაუბრა:

  • 2018 წელს შსს-ს მიერ გაწეული სამუშაოს შედეგების შესახებ;
  • შსს-ში მიმდინარე და დაგეგმილი რეფორმების შესახებ;
  • 2018 წლის 12 მაისს კლუბ "ბასიანსა" და "გალერიში" ჩატარებული საგამოძიებო მოქმედებების შესახებ.