პრეზიდენტი გიორგი მარგველაშვილის განცხადებით, ის "ნატრობს იმ დროს", როდესაც რუსეთის ლიდერს, ვლადიმერ პუტინს დაელაპარაკება.

"არა მისი იმიჯიდან გამომდინარე, არამედ იმ ინტერესიდან გამომდინარე, რომელიც აქვს რომელიმე რუსულ ოჯახს, პერმში, მოსკოვსა, თუ პეტერბურგში და თუ მე, აი, აქედან გამომდინარე დამელაპარაკება რუსი ლიდერი - ჩვენ დავლაგდებით", - განაცხადა პრეზიდენტმა.

მისივე თქმით, ქართული საზოგადოება მზად არის რუსეთთან სასაუბროდ, შესაბამისად თვითონაც მზადაა.

"არამგონია, რომ ქართული საზოგადოება ორად არის გაყოფილი რუსეთთან მიმართებაში. რასაც მე ვხედავ, დავუშვათ გამოკითხვებს, უკვე ბევრი წლის განმავლობაში დომინანტურია, რომ რუსეთთან ურთიერთობის დასტაბილურებას მოსახლეობის დიდი უმრავლესობა უჭერს მხარს", - განაცხადა პრეზიდენტმა.

პრეზიდენტი აღნიშნავს, რომ საუბარია კონკტრეტულ განსახორციელებელ ქმედებებზე.

"ეს კონკრეტული ქმედებები ვერ განხორციელდება თუ არ იქნება მიღწეული შეთანხმება მთავარ თემაზე, რომ რუსეთმა რატომღაც 2008 წელს გადაწყვიტა, რომ აქვს საკმარისი საბაბი ტანკებით და ავტომატებით შეცვალოს საქართველოს რუკა და მერე კიდევ 6 წელიწადში გაუჩნდა საკმარისი საბაბი, რომ შეცვალოს უკრაინის რუკა", - განაცხადა პრეზიდენტმა.