თეთრი ხმაურის მოძრაობის ლიდერის, ბექა წიქარიშვილის განცხადებით, პროტესტი ჯერ არ დასრულებულა, ის მხოლოდ შეჩერებულია და მოთხოვნები ისევ ძალაში რჩება.

"ველოდებით რამდენად შედეგს გამოიღებს ეს შეხვედრები. დღევანდელი შეხვედრით მე პირადად კმაყოფილი არ ვარ", - განაცხადა წიქარიშვილმა.

თეთრი ხმაურის მოძრაობა პერმანენტულ საპროტესტო აქციებს აანონსებდა შემდეგი მოთხოვნებით:

  • დატოვოს თანამდებობა პრემიერ-მინისტრმა, გიორგი კვირიკაშვილმა;
  • გადადგეს შს მინისტრი, გიორგი გახარია;
  • დაისაჯოს 12 მაისის "შავი პარასკევის" ოპერაციაზე პასუხისმგებელი ყველა პირი;
  • "მმართველ ძალაში ჯერ კიდევ ხალხის მხარეს მდგომი პოლიტიკოსები გაემიჯნონ ხელისუფლების მიერ არჩეულ მცდარ კურსს".

თეთრი ხმაურის მოძრაობის წარმომადგენლების თქმით, ისინი აქციებს შაბათამდე წყვეტენ და თუ ხელისუფლებასთან შეთანხმებას ვერ მიაღწევენ აქციები ისევ განახლდება.

დღეს, 15 მაისს შს მინისტრ გიორგი გახარიასთან სპეცოპერაციასთან დაკავშირებით შეხვედრა გაიმართა. მინისტრის გარდა, შეხვედრას ესწრებოდნენ მისი მოადგილე და ცენტრალური კრიმინალური პოლიციის ხელმძღვანელი, რომელიც უშუალოდ ხელმძღვანელობდა სპეცოპერაციას.

გარდა ამისა, მინისტრთან შეხვედრები მიმდინარეობს ნარკოპოლიტიკის რეფორმასთან დაკავშირებითაც.

12 მაისს, დაახლოებით ღამის 12 საათზე თბილისის ორ ღამის კლუბში, ბასიანსა და გალერიში სპეცოპერაცია ერთდროულად დაიწყო. შინაგან საქმეთა სამინისტრო გავრცელებულ განცხადებაში აღნიშნული იყო, რომ სპეცოპერაციას წინ 3-თვიანი საგამოძიებო მოქმედებები უძღვოდა და მათ ნარკორეალიზების ბრალდებით რვა პირი დააკავეს.

როგორც მინისტრის მოადგილე, ნათია მეზვრიშვილი ამბობს, ბასიანსა დაგალერიში ნარკოტიკული საშუალებები იყიდებოდა და პოლიციის მიერ საგამოძიებო მოქმედებების ჩატარება ლეგიტიმური იყო. მისივე განმარტებით, პოლიცია მოქმედებდა კანონის ჩარჩოებში.

გაიგეთ მეტი: