ტერაბანკის მხარდაჭერითა და თბილისის Google-ის დეველოპერების ჯგუფის ორგანიზებით, გლობალური პროექტის, Women Techmakers-ის ღონისძიება გაიმართა.

Women Techmakers, რომელიც Google-ს მიერ წამოწყებული პროექტია, მთელი მსოფლიოს მასშტაბით STEM სფეროში ქალებისა და გოგოების ჩართულობას, მათი მონაწილეობის წახალისებას, წარმატებული მაგალითების ჩვენებას, ქალ და კაც დეველოპერებს შორის ინტეგრაციას, რესურსების გაზიარებასა და თანამშრომლობას ისახავს მიზნად.

პროექტის პარტნიორთა სიას წელს პირველად საფინანსო სექტორი, კერძოდ, ტერაბანკი შეუერთდა. როგორც ბანკში აცხადებენ, საინფორმაციო ტექნოლოგიებში ახალგაზრდების ჩართულობა მომავალი თაობის სწორი ღირებულებებით განვითარებას უკავშირდება:

"ეს ძალიან მნიშვნელოვანი გლობალური ინიციატივაა და სასიხარულოა, რომ მას საქართველოც შეუერთდა. ვართ ამ ღონისძების პარტნიორები, რადგან Women Techmakers-ის მხარდაჭერა ახალგაზრდების განათლებისა და პროგრესის მხარდაჭერას ნიშნავს",- აცხადებს ტერაბანკის მარკეტინგისა და საზოგადოებასთან ურთიერთობის განყოფილების ხელმძღვანელი, სალომე ქოქოსაძე.

Women Techmakers წლევანდელი ღონისძიება კახა ბენდუქიძის საუნივერსიტეტო კამპუსის ბაზალეთის სასწავლო ცენტრში ჩატარდა. მასში მონაწილეობის მისაღებად საქართველოს სხვადასხვა რეგიონიდან 80-ზე მეტი 9-11 კლასების მოსწავლე შეირჩა. სამი დღის განმავლობაში ისინი სხვადასხვა სფეროში მოღვაწე კომპიუტერული ტექნოლოგიების სპეციალისტებისგან საინტერესო, სამოტივაციო და საგანმანათლებლო გამოსვლებს ისმენდნენ. ასევე, გაეცნენ scratch ტექნოლოგიას და მენტორების უშუალო დახმარებით ელემენტარული ანიმაცია და თამაში შექმნეს. ღონისძიებაში 13 სპიკერი და 20 მენტორი იყო ჩართული.

Women Techmakers თბილისი პირველად 2013 წელს გაიმართა და მას შემდეგ რეგულარულად ტარდება.