თეთრი ხმაურის მოძრაობის აქტივისტებისა და შინაგან საქმეთა მინისტრის გიორგი გახარიას შეხვედრა დასრულდა. მოძრაობის აქტივისტის ბექა წიქარიშვილის განცხადებით, აქციის ორგანიზატორები მინისტრთან რამდენიმე საკითხზე შეთანხმდნენ, მათ შორის ნარკოპოლიტიკის რეფორმაზე.

ბექა წიქარიშვილის თქმით, გიორგი გახარიამ პირობა დადო, რომ ნარკოპოლიტიკის რეფორმის განხილვა განახლდება და შედეგამდე პარლამენტი მალე მივა.

"ჩვენ ასევე შევთანხმდით, რომ დაისჯება ყველა ის პირი, რომელმაც გადაამეტა უფლებამოსილებას პარასკევ საღამოს სპეცოპერაციის დროს. საუბარია მაღალი თანამდებობის პირებზე", - განაცხადა ბექა წიქარიშვილმა.

მისი თქმით, მინისტრი იღებს პასუხისმგებლობას, ჯერჯერობით უცნობია, დაიშლება თუ არა აქცია პარლამენტთან. აქციის მონაწილეების ნაწილი გიორგი გახარიასთან მიღწეულ შეთანხმებას თვალებში ნაცრის შეყრას უწოდებს.

აქციის ორგანიზატორებმა მოსაფიქრებლად 10 წუთი ითხოვეს. სწორედ ამ დროში გადაწყდება დაიშლება თუ გაგრძელდება აქცია პარლამენტთან.