სამეგრელო-ზემო სვანეთში დაკარგული სერგეი სმისლოვის საპოვნელად უკვე მეშვიდე დღეა ინტენსიური სამძებრო სამუშაოები მიმდინარეობს. ამის შესახებ On.ge-ს შსს-ში განუცხადეს.

1 კვირის წინ დაკარგულ გერმანიის მოქალაქეზე ძებნა 276-ე მუხლით მიმდინარეობს, რაც ავტოსაგზაო შემთხვევას გულისხმობს. თავად ოჯახი კი უბედურ შემთხვევას გამორიცხავს.

როგორც დაკარგულის შვილმა რუსთავი 2-ს უთხრა, ბიზნესმენი სერგეი სმისლოვი სავარაუდოდ ოკუპირებული ტერიტორიის სიახლოვეს გაუჩინარდა და მას თან დიდი ოდენობით თანხა ჰქონდა.

ოჯახის წევრი ამბობს, რომ მას მეგობარმა დაურეკა, რის შემდეგაც სმისლოვი ზუგდიდიდან მანქანით გავიდა, თუმცა მოგვიანებით როდესაც მასთან დაკავშირება სცადეს, მობილური გამორთული ჰქონდა.

ოჯახის ვერსიით, ბიზნესმენის კვალი სავარაუდოდ სოფელ მუჟავასთან წყდება. ამ დრომდე ვერ პოულობენ მის მანქანასაც.