ტერაბანკმა საქართველოს ინოვაციების და ტექნოლოგიების სააგენტოსთან თანამშრომლობა დაიწყო. ამ თანამშრომლობის ფარგლებში, იგი პროექტ "სტარტაპ მეგობრულში" ჩაერთო და სამომავლოდ სტარტაპების განვითარებას შეუწყობს ხელს.

კერძოდ, ტერაბანკი სააგენტოს ბენეფიციარ სტარტაპებს სპეციალური პროდუქტით ან სერვისით უზრუნველყოფს და მათთან ერთად ერთობლივ ინიციატივებს განახორციელებს.

ტერაბანკის ყველა ის შეთავაზება, რომელიც სტარტაპებისთვის იქნება განკუთვნილი, პროექტის ოფიციალურ პორტალზე, Startupfriendly.gov.ge-ზე განთავსდება. ვებგვერდზე, რომლის პრეზენტაციაც ტექნოპარკში გაიმართა, "სტარტაპ მეგობრული" კომპანიების სერვისებთან ერთად, სტარტაპების შესახებ ცნობებიც მოიყრის თავს, რაც ორივე მხარეს ინფორმაციის ერთ სივრცეში გაცვლის შესაძლებლობას მისცემს.

"სტარტაპ მეგობრული" მიზნად სტარტაპების განვითარებაში კერძო სექტორის ჩართვას ისახავს.

"ზოგადად მსგავსი პლატფორმები, თანამშრომლობა სტარტაპებსა და განვითარებულ კომპანიებს შორის ძალიან მნიშვნელოვანია. ერთი მხრივ იმიტომ, რომ სტარტაპებს ეძლევათ უფრო სწრაფად განვითარების შესაძლებლობა და მეორე მხრივ, დიდი კომპანიები, ამ თანამშრომლობის შედეგად, შეძლებენ მეტი ახალი იდეა მიიღონ და მათი გენერირების კომერციალიზაცია მოახდინონ", - განაცხადა პროექტის პორტალის პრეზენტაციაზე პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა.

პროექტი "სტარტაპ მეგობრული" 2017 წელს საქართველოს პრემიერ-მინისტრის ინიციატივით დაიწყო. მას უკვე 24 ქართული და საერთაშორისო კომპანია შეუერთდა, ტერაბანკი ინიციატივაში ჩართულ ბიზნესორგანიზაციებს შორის საფინანსო სექტორის ერთადერთი წარმომადგენელია.

"ტერაბანკის პროექტში მონაწილეობა კიდევ ერთხელ უსვამს ხაზს, თუ რამდენად მნიშვნელოვანია ჩვენი ბანკისთვის მეწარმეების როლი და მათი წვლილი ქვეყნის ეკონომიკის განვითარებაში“, - აღნიშნავენ ტერაბანკში.