საქართველოს მთავრობის ადმინისტრაციაში სტრუქტურული რეორგანიზაცია მიმდინარეობს. ამის შესახებ საქართველოს მთავრობის ადმინისტრაციის უფროსმა შალვა თადუმაძემ ჟურნალისტებს განუცხადა.

საქართველოს პრემიერ-მინისტრმა შესაბამისი ბრძანება უკვე გამოსცა.

შალვა თადუმაძის განმარტებით, ამ ეტაპზე მიმდინარეობს იმ სტრუქტურული ერთეულების საქმიანობის ფუნქციური ანალიზი, რომლებიც დღეის მდგომარეობით არსებობენ და მათი ეფექტიანობის კიდევ უფრო გაზრდის მიზნით, შესაბამისი გადაწყვეტილებები ერთი თვის ვადაში, კანონმდებლობით დადგენილი წესით მიიღება.

ჟურნალისტების კითხვას, გამოიწვევს თუ არა რეორგანიზაცია თანამშრომლების ოპტიმიზაციას, შალვა თადუმაძემ უპასუხა, რომ შეიძლება მიღებული იყოს ნებისმიერი გადაწყვეტილება, რომელიც დაკავშირებულია ადმინისტრაციის ფუნქციის უფრო ეფექტიანი და ხარისხიანი განხორციელებისთვის.

მთავრობის ადმინისტრაციის უფროსის განმარტებით, რეორგანიზაცია მიმდინარეობს იმ საბიუჯეტო რესურსის ფარგლებში, რომელიც მთავრობის ადმინისტრაციისთვის 2018 წლისთვის არის გამოყოფილი.

"განხორციელებული სამთავრობო ცვლილებების შედეგად ადმინისტრაციის რამდენიმე მაღალი თანამდებობის პირი გადავიდა სხვა სამინისტროებში, რამაც შესაბამისად გამოიწვია რეორგანიზაციის გამოცხადება", - განაცხადა შალვა თადუმაძემ.

რეორგანიზაციის ფარგლებში ასევე გამოცხადდება კონკურსი იმ თანამდებობების დასაკავებლად, რომლებიც მთავრობის ადმინისტრაციაში ამჟამად ვაკანტურია.