რა თქმა უნდა უცნაური არაფერია იმაში, როცა ერთი და იგივე ტანისამოსი ორჯერ, სამჯერ და უფრო მეტჯერაც გაცვია, თუმცა ეს ვარსკვლავებს არ ეხებათ. ისინი იშვიათად, შეიძლება ითქვას, რომ თითქმის არასდროს ჩნდებიან ერთი და იგივე ტანსაცმლით კამერის წინ, მით უმეტეს წითელ ხალიჩაზე და კიდევ უფრო მით უმეტეს კანში.

როგორც აღმოჩნდა, ქეით ბლანშეტმა ამ "ტრადიციის" დამსხვრევა გადაწყვიტა და კანის კინოფესტივალის გახსნის საღამოზე ზუსტად ის კაბა ეცვა, რაც 2014 წლის ოქროს გლობუსზე.

მიუხედავად იმისა, რომ მოდის კრიტიკოსები ვარსკვლავების ასეთ გადაწყვეტილებებს ხშირად უარყოფითად აფასებენ, ქეითის მისამართით მსგავსი შენიშვნები არ გაჟღერებულა.

ბლანშეტის ამ საქციელს თავისი, საკმაოდ გაბედული და მისასალმებელი მიზეზი ჰქონდა.

ამ ჟესტით მსახიობმა მხარდაჭერა გამოუცხადა ორგანიზაცია Green Carpet Challenge-ს, რომელიც მოდის ინდუსტრიაში გადაყრილი მატერიის კვლავწარმოებას ეწევა. ამ ყველაფრის იდეის ავტორი კი კოლინ ფერტის ცოლი, ლივია ფერტია.