საქართველოს ძიუდოს ნაკრების რამდენიმე წევრი გუნდის კაპიტან ვარლამ ლიპარტელიანთან ერთად ფედერაციის პრეზიდენტის დავით ქევხიშვილის გადადგომას ითხოვს.

ეს განცხადება მათ რამდენიმე წუთის წინ გააკეთეს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

ვარლამ ლიპარტელიანის თქმით, აქამდე მათ სურდათ, რომ პრობლემა "ოჯახიდან" არ გასულიყო და თავად მოეგვარებინათ, თუმცა მდგომარეობა იქამდე მივიდა, რომ ერთადერთ გამოსავლად სწორედ რადიკალური მოთხოვნები-ღა ესახებათ.

"ნაკრების გადაწყვეტილებით, ფედერაციაში არსებული ჩვენთვის მიუღებელი და ამ სპორტისთვის დამაზიანებელი მდგომარეობის გამო, ვაცხადებთ, რომ არ მივიღებთ მონაწილეობას არცერთ შეჯიბრში და ვწყვეტთ ვარჯიშს, სანამ ფედერაციის პრეზიდენტი არ გადადგება დაკავებული თანამდებობიდან".

"ფაქტია, რომ იგი ვერ ართმევს თავს დაკისრებულ მოვალეობას", - ნათქვამია განცხადებაში.