ევროპული საქართველოს პოლიტსაბჭოს თავმჯდომარის, გიგა ბოკერიას განცხადებით, უმრავლესობის მხრიდან პრეზიდენტისთის დებატების შეთავაზება იაფფასიანი პოლიტიკური პიარია.

"ეს გუშინდელ ვითომ "პრინციპულობას" ვერ გაამართლებს. მათ შეეძლოთ, საღი აზრის ფარგლებში ცვლილებები მიეღოთ და და დაეთმოთ პრეზიდენტისთვის, მაგრამ გამოიჩინეს რაღაც პოლიტიკური ღირსება, რაც სხვა დროს ავიწყდებათ ხოლმე. პრინციპულობაა საჭირო, როცა მინისტრები რეგლამენტს არღვევენ და პარლამენტს შეურაცხყოფას აყენებენ. ამას უმრავლესობაში ითმენენ და სრულ უთავმოყვარეობას ავლენენ",- განაცხადა გიგა ბოკერიამ.

საპარლამენტო უმრავლესობამ პრეზიდენტს სატელევიზიო დებატები შესთავაზა.

2 მაისს, პრეზიდენტის ყოველწლიური მოხსენების დროს, პარლამენტში, გიორგი მარგველაშვილმა პროტესტის ნიშნად სხდომათა დარბაზი დატოვა.მას სურდა ეპასუხა იმ კითხვებისთვის, რასაც დეპუტატები უსვამდნენ, იმ ფორმატით, რომელიც რეგლამენტით გათვალისწინებული არ იყო. საქართველოს პარლამენტის თავმჯდომარემ საკითხი, დებატების ფორმატის შეცვლის შესახებ კენჭისყრაზე დააყენა.

დეპუტატებმა პრეზიდენტის ინიციატივას მხარი არ დაუჭირეს, რის შემდეგაც გიორგი მარგველაშვილმა პარლამენტის შენობა დატოვა და არც დასკვნითი სიტყვის უფლება გამოიყენა.