ჩემპიონთა ლიგის ნახევარფინალის ორმატჩიან დაპირისპირებაში ლივერპულმა რომა დაამარცხა და ფინალის საგზურიც მოიპოვა. მართალია, გუშინ რომში გამართულ შეხვედრაში მერსესაიდელები ანგარიშით 2:4 დამარცხდნენ, თუმცა საკუთარ კედლებში მეტოქეებთან შეხვედრა სამბურთიანი სხვაობით ჰქონდათ მოგებული, რამაც ისინი შემდეგ ეტაპზე გაიყვანა.

ლივერპულის მთავარი მწვრთნელის იურგენ კლოპის თქმით, მთავარი მატჩი წინაა.

"მე ჩემპიონთა ლიგის ფინალში ვყოფილვარ, მაგრამ ვერ მომიგია. ხალხი ქუჩაში არ მაჩერებდა და არ მეუბნებოდა, დიდი მადლობა, რომ გუნდი ფინალში გაიყვანეო. ევროპა ლიგის ფინალშიც ვყოფილვართ. არც ამის გამო მიხდიან მადლობას. მაგ მატჩების მერე ტიტული არ მიმიღია. ჩვენ მთავარი მოსაგები შეხვედრა ჯერ კიდევ წინ გვაქვს".

"ფინალში გასვლა ძალიან კარგია, მაგრამ თასის მოგება - კიდევ უკეთესი. ჩვენ მზად ვიქნებით, თუმცა ეს მადრიდის რეალია. მათზე გამოცდილი ამ ტურნირზე არავინაა. ბოლო 5 წელიწადში ისინი მეოთხედ გავიდნენ ფინალში. ისინი გამოცდილები არიან, თუმცა ჩვენ მოგებას მოწყურებულები ვიქნებით", - აღნიშნა კლოპმა.