სამხრეთ თურქეთში მდებარე ინჯირლიკის ავიაბაზის მეთაური, გენერალი ბეკირ ერჩან ვანი, ქვეყანაში ხელისუფლების დამხობის მცდელობაში მონაწილეობის ბრალდებით დააკავეს. ინფორმაციას Reuters ავრცელებს.

ინჯირლიკის ბაზას, რომელიც თურქეთმა დღეს დახურა, აშშ-ს სამხედრო საჰაერო ძალები და საერთაშორისო კოალიციის სხვა წევრები ე.წ. ისლამურ სახელმწიფოსთან საბრძოლველად იყენებენ.

ბოლო მონაცემებით, მას შემდეგ, რაც თურქეთის ხელისუფლების გადატრიალების მცდელობა წარუმატებლად დასრულდა, თანამდებობა დაატოვებინეს 2,745 მოსამართლეს, დაკავებულია 140 მათგანი.

დაპატიმრებულებს შორის არიან სამხედრო მეთაურები, მათ შორის მეორე არმიის ხელმძღვანელიც, რომელიც საზღვარს სირიასთან, ერაყთან და ირანთან იცავს. ამასთან, ასობით სამხედრო პირი, რომლებსაც ბრალს გადატრიალების მონაწილეობაში სდებენ, ანკარაში გადაიყვანეს.

BBC-ის ცნობით, დაკავებულთა შორის არიან: თურქეთის მესამე არმიის ხელმძღვანელი - გენერალი ერდალ ოზთურკი, მეორე არმიის ხელმძღვანელი - გენერალი ადემ ჰუდუტი, საჰაერო თავდაცვის ყოფილი უფროსი - აკინ ოზთურქი, ერთ-ერთი მთავარი მოსამართლე - არფარლსან ალთანი.

როიტერსის ცნობით, გარდაცვლილია სულ ცოტა 265 ადამიანი, საიდანაც 161 მშვიდობიანი მოქალაქე ან პოლიციელი, დანარჩენი 104 კი გადატრიალებაში მონაწილე პირია. დაშავდა 1 000-ზე მეტი ადამიანი.

როგორც ერდოღანმა განაცხადა, გადატრიალების მცდელობაში მონაწილეებს მომხდარი "ძვირად დაუჯდებათ".