საქართველოს ყოფილი პრემიერი და ქართული ოცნების დამფუძნებელი, ბიძინა ივანიშვილი პარტიის პოლიტსაბჭოს სხდომას ესწრება. ამის შესახებ ამავე საბჭოს წევრმა თემურ ჭკუასელმა განაცხადა.

დღევანდელ პოლიტსაბჭოს სხდომაზე გაირკვევა, ვინ დატოვებს საბჭოს შემადგენლობას და ვინ იქნებიან ახალი სახეები. დეპუტატ თემურ ჭკუასელის თქმით, წევრების რაოდენობა 15-მდე შემცირდება.

ორი დეპუტატის ვინაობა, რომელიც პოლიტსაბჭოს დატოვებს, უკვე ცნობილია. საპარტნიორო ფონდის ხელმძღვანელის, დავით საგანელიძის განცხადებით, მან ქართული ოცნების პოლიტსაბჭოს დატოვების გადაწყვეტილება მიიღო. ასევე პოლიტსაბჭოს დასატოვებლად მზადაა დეპუტატი თემურ ჭკუასელი.

დღევანდელ პოლიტსაბჭოს სხდომაზე დამტკიცდება საბჭოს წევრების ახალი შემადგენლობა, რომელიც დასამტკიცებლად ყრილობის საორგანიზაციო ჯგუფს გადაეცემა. ასევე ყრილობაზე აირჩევენ პარტიის ახალ თავმჯდომარეს ბიძინა ივანიშვილს, იქამდე კი პარტიის ხელმძღვანელი პრემიერ-მინისტრი გიორგი კვირიკაშვილია.