ოსკარის მფლობელმა ენტონი ჰოპკინსმა ტვიტერის საკუთარ გვერდზე ვიდეო გამოაქვეყნა, რომელშიც სალსას მუსიკის ფონზე საოცარ და აქამდე არნახულ ცეკვას ასრულებს.

80 წლის მსახიობი აქამდე ყველასთვის ცნობილი იყო, როგორც მშვიდი, მხიარული და გაწონასწორებული ადამიანი, თუმცა ამ ვიდეოში მან თავისი ნამდვილი სახე გვანახა! [ან უბრალოდ ჰანიბალ ლექტერის ნოსტალგია მოგვიკლა].

"აი რა ხდება, როცა მხოლოდ მუშაობ და საერთოდ არ ერთობი", - დაწერა მსახიობმა ვიდეოზე.

და ეს სიტყვები აუცილებლად გაგახსენებთ საშინელებათა ჟანრის ფილმს The Shining, რომელშიც ჯეკ ნიკოლსონი მონაწილეობს.

გამოქვეყნებიდან სამ დღეში, ვიდეოს თითქმის უკვე 9 მილიონი ნახვა აქვს.

ვიდეოში ჰოპკინსი ხმას არ იღებს, უბრალოდ კამერაში იყურება, ცეკვავს და ნამდვილი ჰანიბალივით იცინის! აშკარაა, რომ გენიალური მსახიობი 80 წლის ასაკშიც ახერხებს ემოციებით თავბრუ დაგვახვიოს.

თუ ვიდეოს შემდეგ თავს ცოტა შეუძლოდ გრძნობთ, წყალი დალიეთ და ჰოპკინსის სულ ახალი ვიდეო ნახეთ, რომელშიც ის [ასევე ჰანიბალივით] მშვიდად უკრავს როიალზე.

"დღეს მხოლოდ გართობა და არანაირი მუშაობა", - წერს 80 წლის ჰანიბ... კხმ.. ჰოპკინსი.