საქართველოს კულტურული მემკვიდრეობის დაცვის ეროვნულმა სააგენტომ უჯარმის ციხე-ქალაქის რეაბილიტაცია-კონსერვაციის სამუშაოებისთვის ტენდერი გამოაცხადა. ისტორიული ძეგლის შესაკეთებლად 300 000 ლარის დახარჯვაა გათვალისწინებული.

შესასრულებელი სამუშაოები

  • ტერიტორიის გაწმენდა და ზედმეტი მიწის მოჭრა;
  • გეოლოგიური კვლევების ჩასატარებლად, №18 კოშკის ჩრდილოეთ ნაწილში ძალოვანი ხარაჩოს მოწყობა;
  • ინვენტარული ხარაჩოს მოწყობა ციტადელის კედლების გაწმენდა-კონსერვაციის სამუშაოების ჩასატარებლად;
  • კედლების საპირე წყობის გადაწყობა 30% ახალი მასალის დამატებით, ბზარების ინექტირება და კედლების კონსერვაცია კირ-დუღაბით;
  • ორი გადასახედი ბაქნის, ლითონის საფეხურების და მოაჯირების მოწყობა;
  • სავალი ბილიკების მოწყობა ფლეთილი ქვის ფილებით.

არსებული მონაცემები უჯარმის ციხე-ქალაქის შესახებ

უჯარმის ციხე-ქალაქი საგარეჯოს მუნიციპალიტეტში სოფ. უჯარმის ჩრდილო- დასავლეთით მდინარე ივრის მარჯვენა ნაპირის ფერდობზე, თბილისი-თელავის სამანქანო გზის პირას მდეობარეობს. საქართველოს კულტურული მემკვიდრეობის დაცვის ეროვნული სააგენტოს ინფორმაციით, ციხე-ქალაქი რთულ რელიეფზე - 30 000 მ2 ფართობზეა გაშენებული. ძეგლი ორი ნაწილისგან შედგება. ციტადელი - ზედა ანუ დედაციხე, სადაც განლაგებულია მეფეთა სასახლე, ჯვარპატიოსნის სახელობის კარის მცირე ეკლესია, მარანი და წყალსაცავი. ქვედა ციხე კი ციტადელის ჩრდილოეთი მხრიდან მდინარე ივრის ნაპირამდე ოთხკუთხა გალავნითაა შემოსაზღვრული.

"გალავნის კედლების უწყვეტობას არღვევს ერთმანეთისგან სიმეტრიულად დაშორებული გეგმით სწორკუთხა სამსართულიანი კოშკები. უჯარმის ციხის აღმშენებლობა და განვითარება ძირითადად, ვახტანგ მეფის (გორგასალი) სახელთანაა დაკავშირებული", - აღნიშნავს სააგენტო სატენდერო განცხადებაში.

მდგომარეობა

სააგენტოს მონაცემებით, უჯარმის ციხე ძლიერ დაზიანებული სახითაა შემორჩენილი. გალავანი როგორც ციტადელზე, ასევე ქვედა ციხეზე მორღვეულია, ხოლო რიგ მონაკვეთებში - მთლიანად დანგრეული.

2000-იან წლებში შეკეთდა ციხემდე მისასვლელი ბილიკი. მოეწყო ლითონის საფეხურებიანი კიბე. იმავე პერიოდში გაიწმინდა ქვედაციხის ტერიტორიის ნაწილი.