თურქეთის პრეზიდენტმა, რეჯეფ ტაიპ ერდოღანმა განაცხადა, რომ 17 თვით ადრე 2018 წლის 24 ივნისს ვადამდელი საპრეზიდენტო და საპარლამენტო არჩევნები ერთად ჩატარდება. ინფორმაციას აზერბაიჯანული ინგლისურენოვანი გამოცემა Hurriyet Daily News ავრცელებს.

ვადამდელი არჩევნების შესახებ შეთანხმებას მმართველმა სამართლიანობისა და განვითარების პარტიამ და ეროვნული მოძრაობის პარტიამ მიაღწიეს. სწორედ ამ უკანასკნელი პარტიის ლიდერის იდეა იყო ვადამდელი არჩევნების დანიშვნა.

"თურქეთის საშინაო და საგარეო დღისწესრიგმა გვაიძულა, რომ ვადამდელი არჩევნების გზით გავთავისუფლდეთ გაურკვევლობისგან", - განაცხადა ერდოღანმა.

თურქეთში ეს არჩევნები ისტორიული იქნება, რადგან აღმასრულებელი ფუნქცია დაეკისრება პრეზიდენტს და პრემიერ-მინისტრის თანამდებობა გაუქმდება.

საპრეზიდენტო არჩევნების პირველ ტურში გამარჯვებისთვის კანდიდატმა ხმების 50 პროცენტზე მეტი უნდა დააგროვეს. წინააღმდეგ შემთხვევაში, მეორე ტურში საუკეთესო შედეგის მქონე ორი კანდიდატი იბრძოლებს.

სავარაუდოდ, სამართლიანობისა და განვითარების პარტია და ეროვნული მოძრაობის პარტია საერთო კანდიდატად რეჯეფ ტაიპ ერდოღანს დაასახელებენ. გამარჯვების შემთხვევაში, ხელისუფლების სათავეში ის 2023 წლამდე იქნება და მორიგ საპრეზიდენტო არჩევნებშიც შეძლებს მონაწილეობის მიღებას.