2018 წლის 17 აპრილს, განსაკუთრებული სისასტიკით ჩადენილი მკვლელობისა და დანაშაულის შეუტყობინებლობისთვის ბრალდებულ ორ პირს თბილისის საქალაქო სასამართლომ აღკვეთის ღონისძიების სახედ პატიმრობა შეუფარდა. ამით დაცვის მხარის შუამდგომლობა, აღკვეთის ღონისძიებად 20 000-ლარიანი გირაოს შეფარდების შესახებ, სასამართლომ არ გაითვალისიწინა.

"სასამართლომ მიიჩნია, მხოლოდ ბრალდებულთა პატიმრობაში ყოფნის შემთხვევაში მიიღწევა აღკვეთის ღონისძიების მიზნები. კერძოდ თავიდან იქნება აცილებული მათი მხრიდან მტკიცებულებათა მოპოვებაში ხელის შეშლის, ახალი დანაშაულის ჩადენის და ვ. ბ.-ს [ვეფხია ბაქრაძის] მხრიდან მიმალვის რისკები და საფრთხეები", - აღნიშნულია სასამართლოს განცხადებაში.

როგორც ვეფხია ბაქრაძის ადვოკატი ამბობს, ბრალდებულმა დანაშაული ნაწილობრივ აღიარა.

"ვეფხია აღიარებს ფაქტს, თუმცა არ აღიარებს იმ დამამძიმებელ გარემოებას, რის გამოც აღნიშნული კვალიფიკაცია მიიღო. ზოგადად, დამამძიმებელ გარემოებას, განსაკუთრებით სისასტიკით ჩადენილ მკვლელობას არ აღიარებს", - განაცხადა დაკავებულის ადვოკატმა.

13 აპრილს, თბილისში, ბარნოვის ქუჩაზე, 25 წლის გოგოს შვილების თანდასწრებით ყელი გამოჭრეს. ის ადგილზევე გარდაიცვალა.