თბილისის 151-ე სკოლა ერთ-ერთია იმ სკოლებს შორის, რომელის მერვე კლასის ბიოლოგიის წიგნშიც მარიხუანას შესახებ დემონიზაციისა და სტიგმის საფრთხის შემცველი ინფორმაცია წერია. სწორედ ასე აფასებენ წიგნში მარიხუანას შესახებ ინფორმაციას მშობლების ნაწილი და ამ საკითხზე მომუშავე დარგის სპეციალისტები.

ბიოლოგიის წიგნში ვკითხულობთ, რომ მარიხუანას რეგულარული მიღების შედეგად, "ბოდვითი აზროვნებისკენ მიდრეკილება ვითარდება. დიდი დოზით სისტემატურმა მოხმარებამ კი შეიძლება ფსიქოზი გამოიწვიოს". გარდა ამისა, აღნიშნულია, რომ მარიხუანას მოწევა ბევრად უფრო აზიანებს სასუნთქ სისტემას და ფილტვის კიბოს განვითარების რისკიც ბევრად უფრო მაღალია.

"მარიხუანას მოწევა თამბაქოზე ბევრად უფრო ძლიერად აზიანებს სასუნთქ სისტემას. ბევრად უფრო მაღალია ფილტვის კიბოს განვითარების რისკიც. თავისი დამაზიანებელი ეფექტით ერთი ულუფა მარიხუანა ხუთი ღერი სიგარეტის ტოლფასია", - წერია წიგნში.

On.ge-მ წიგნის შესახებ 151-ე სკოლის მერვე კლასის ერთ-ერთი მოსწავლის მშობლისგან შეიტყო. მშობლის თქმით, ინფორმაცია მცდარი და არაადეკვატურია. მისთვის გაუგებარია, როგორ გაიარა ისეთმა წიგნმა ავტორიზაცია, რომლითაც მასწავლებლები მოსწავლეებს დაუზუსტებელ ინფორმაციას აწვდიან და სტიგმის გაღრმავებას ხელს უწყობენ.

იმის შესამოწმებლად, შეიცავს თუ არა გაკვეთილი მცდარ ინფორმაციას, ან რამდენად პრობლემურია საკითხი, On.ge-მ დაბეჭდილი ტექსტი წამალდამოკიდებულებისა და ნივთიერებების თემაზე მომუშავე ორგანიზაციებს გადაუგზავნა.

ფსიქოთერაპევთ, გიორგი წოწკოლაურის თქმით, ტექსტი მოსწავლეებს მარიხუანას შესახებ ცალსახად მცდარ ინფორმაციას აწვდის. მისი თქმით, მარიხუანას მოქმედების შედეგებზე დაწერილი ინფორმაცია გადაჭარბებული და გამძაფრებულია.

"უცნობია ინფორმაციის წყარო და უსამართლო და არასწორია ამ შედეგების განზოგადება მარიხუანას ყველა მომხმარებელზე. როგორც რეკრეაციულ, ასევე, მუდმივ მომხმარებელზე. წინასწარ შიშის და მომხმარებლებზე სტიგმის დათესვა არ მიმაჩნია მართებულად. ჰალუცინოგენი ფსიქოაქტიური ნივთიერებები წარმოადგენს იმ ნივთიერებათა ჯგუფს, რომლის შედეგიც და ეფექტიც ინდივიდუალური და საკმაოდ განსხვავებულია", - ამბობს გიორგი წოწკოლაური და დასძენს, რომ მსგავსი ინფორმაცია სტიგმას აღრმავებს.

თეთრი ხმაურის მოძრაობის აქტივისტის, დათო სუბელიანის თქმით, მოკლე ინფორმაცია მცენარე კანაფის შესახებ ცალსახად მიკერძოებული და სტიგმის შემცველი ენითაა დაწერილი.

"მარიხუანას დემონიზაციის ნაცვლად, ტექსტი მიზნად უნდა ისახავდეს მოსწავლეებს მიაწოდოს, ერთი მხრივ, მაქსიმალურად ობიექტური ინფორმაცია, და მეორე მხრივ, ყურადღება გაამახვილოს იმ რისკებზე, რომელიც ამ ასაკის ადამიანების მიერ კანაფის გამოყენებას ახლავს თან", - განმარტავს ის.

მისი აზრით, ტექსტი კარგი ანარეკლია ქვეყანაში არსებული ნარკოპოლიტიკის, სადაც მიუხედავად რიტორიკისა, სახელმწიფო არაფერს აკეთებს მტკიცებულებებზე დაფუძნებული პრევენციული სისტემის ასამუშავებლად.

"დღეს სკოლა ვერ ახერხებს მოზარდები აღჭურვოს იმ ინფორმაციით, რომელიც მათ დაეხმარება გაუმკლავდნენ გამოწვევებსა და რისკებს, რომელთაც ისინი აწყდებიან. არ არის გასაკვირი, რომ ბოლო ევროპული სასკოლო გამოკვლევის მიხედვით, ქართველი მოზარდების მიერ ნარკოტიკული საშუალებების მოხმარება მეტწილად აღემატება საშუალო ევროპულ მაჩვენებლებს", - ამბობს დათო სუბელიანი.

სახელმძღვანელოს, რომელიც დარგის ექსპერტების თქმით, დაუსაბუთებელ ინფორმაციას შეიცავს, გრიფირება აქვს გავლილი. იმის გასარკვევად, რაზე დაყდნობით მისცეს ბიოლოგიის წიგნს გრიფირება და არის თუ არა ერთ-ერთი მოთხოვნა ფაქტებზე დაფუძნებული ინფორმაციის გავრცელება, განათლების სამინისტროს დავუკავშირდით. On.ge უწყებიდან პასუხს მესამე დღეა ელოდება.