პირადი და ოჯახური საიდუმლოს ხელყოფის ბრალდებით საქართველოს პროკურატურამ 5 პირის მიმართ სისხლისსამართლებრივი დევნა დაიწყო. გამოძიების პროცესში სამართალდამცავებმა თბილისში 6 საცხოვრებელი ბინა გაჩხრიკეს, 5 ობიექტიდან კი სათვალთვალო კამერების ვიდეოჩანაწერი გამოითხოვეს. პოლიციამ დაკითხა 10 პირი და რამდენიმე ჟურნალისტი, რომლებმაც ინფორმაცია გავრცელებული კადრების შესახებ Facebook გვერდზე მიიღეს, მოწმეების მონაწილეობით დაათვალიერეს აღნიშნულის ამსახველი ელექტრონული მიმოწერა.

გამოძიებით დადგინდა, რომ 2015 წლის 26 დეკემბერს "ქრონიკა+"-ის დირექტორს ელისო კილაძეს გელა ღურცკაიამ წარუდგინა სხვისი პირადი და ოჯახური საიდუმლოს ამსახველი უკანონო ვიდეოჩანაწერი. 3 თებერვალს დააკავეს გელა ღურცკაია, რომლის საცხოვრებელი სახლიდანაც ამოიღეს მეხსიერების ბარათი, რომელზეც სხვისი პირადი და ოჯახური საიდუმლოს ამსახველი ვიდეოჩანაწერი იყო.

პროკურატურამ დაადგინა იმ პირთა წრე, რომლებიც აღნიშნული ვიდეოჩანაწერის მოპოვებასა და გავრცელებაში მონაწილეობდნენ. გამოძიებამ გაარკვია, რომ 2015 წლის დეკემბერში შს კონსტიტუციური უსაფრთხოების დეპარტამენტის ყოფილი თანამშრომელი ნიკოლოზ ხაჭაპურიძე დაუკავშირდა ღურცკაიას, რომელსაც ფულადი ანაზღაურების სანაცვლოდ ერთ-ერთი ფარული ჩანაწერის ელისო კილაძისათვის გასაღება შესთავაზა. ხაჭაპურიძეს კი ხსენებული ჩანაწერები ინგა ჩიტოიანმა გადასცა, რომელმაც ვიდეოები, 2015 წლის ზაფხულში, მათი რეალიზაციის მიზნით, ადვოკატ ირაკლი ფხალაძისგან მოიპოვა:

"2014 წელს ადვოკატმა ირაკლი ფხალაძემ აღნიშნული ჩანაწერები გამოართვა ზურაბ ჯამალაშვილს და გადაწყვიტა ფულადი ანაზღაურების სანაცვლოდ მათი გავრცელება. ირაკლი ფხალაძის საცხოვრებელი სახლის ჩხრეკის შედეგად, 2016 წლის 13 მარტს ამოიღეს ბრალდებულის პერსონალური კომპიუტერი, სადაც ინახებოდა ხსენებული და სხვა ვიდეოჩანაწერები, რომლებიც როგორც დაადგინეს 2012 წლის ივნისამდე პერიოდშია შექმნილი".

გამოძიებამ დაადგინა, რომ ზურაბ ჯამალაშვილს, რომელმაც ადვოკატ ფხალაძეს გადასცა ვიდეოჩანაწერები, ჰყავს შვილი ვასილ ჯამალაშვილი, რომელიც 2012 წლის 18 ივლისიდან 2012 წლის 15 ოქტომბრამდე პერიოდში მუშაობდა კონსტიტუციური უსაფრთხოების დეპარტამენტის ოპერატიულ-ტექნიკური დეპარტამენტის მეოთხე სამმართველოს უფროსის მოადგილის თანამდებობაზე.

პროკურატურის განცხადებით, ამ ეტაპზე სისხლისამართლებრივი დევნა დაწყებულია გელა ღურცკაიას, ნიკოლოზ ხაჭაპურიძის, ინგა ჩიტოიანისა და ირაკლი ფხალაძის მიმართ საქართველოს სსკ-ის 157-ე მუხლის მესამე ნაწილის ა ქვეპუნქტით, რაც სასჯელად თავისუფლების ხუთ წლამდე აღკვეთას ითვალისწინებს. 2016 წლის 14 მარტს კი დააკავეს ზურა ჯამალაშვილი, დანაშაულისათვის გათვალისწინებული საქართველოს სსკ-ის 157-ე მუხლის პირველი ნაწილით.

გამოძიების პროცესში სასამართლომ განჩინებების საფუძველზე სამართლებრივი დახმარებისათვის აშშ-ის კომპეტენტურ ორგანოებს YouTube-ის, Facebook-ისა და Google-ის სერვერებიდან IP მისამართები შესახებ ინფორმაცია გამოთხოვა იმისათვის, რომ დაადგინოს, რომელი ქვეყნიდან ატვირთეს ვიდეო და მოხდეს ინტერნეტ მომხმარებლის იდენტიფიცირება. ქართულმა მხარემ აშშ-ს ასევე სთხოვა ინფორმაცია იმის შესახებ, თუ კონკრეტულად ვინ შექმნა Facebook გვერდი პოლიტიკოსის სახელით, საიდანაც ჟურნალისტებთან და სხვა პირებთან დაიგზავნა ვებგვერდის ლინკი, სადაც განთავსებული იყო ვიდეომასალა.

11 მარტს გავრცელდა სავარაუდოდ ერთ-ერთი ქართველი პოლიტიკოსის პირადი ცხოვრების ამსახველი ვიდეო მასალა. 14 მარტს ამ ტიპის კიდევ ერთი ვიდეო მასალა გავრცელდა, რომელშიც პირთა იდენტიფიცირება შეუძლებელია, რადგან მათი სახეები დაფარულია. ვიდეოს ავტორები ემუქრებიან კონკრეტულ პოლიტიკოსებს, რომ მათი პირადი ცხოვრების ამსახველ ჩანაწერებს კიდევ გაავრცელებენ თუ 31 მარტამდე თავიანთ საქმიანობას არ შეწყვეტენ.

On.ge აღნიშნული პოლიტიკოსების სახელებსა და გვარებს შეგნებულად არ ასახელებს.