სახელმწიფო უსაფრთხოების სამსახურმა მცხეთის მერიის წარმომადგენელი ცხვარიჭამიის ადმინისტრაციულ ერთეულში დიდი ოდენობით ქრთამის აღების ბრალდებით დააკავა. უწყების განმარტებით, დაკავებული სასოფლო-სამეურნეო მიწის ნაკვეთის იჯარით გაცემის სანაცვლოდ, ქრთამის სახით, 7 000 აშშ დოლარს ითხოვდა.

"გამოძიებამ დაადგინა, რომ დაკავებული საქართველოს მოქალაქეს მცხეთის რაიონის სოფელ ცხვარიჭამიაში მდებარე, სახელმწიფო საკუთრებაში არსებული არასასოფლო-სამეურნეო დანიშნულების, საერთო ჯამში 2 400 კვადრატული მეტრი, სამი მიწის ნაკვეთის იჯარით გაცემაში დახმარებას დაჰპირდა, რის სანაცვლოდაც ქრთამის სახით 7 000 აშშ დოლარის გადახდა მოსთხოვა", - აღნიშნულია სუს-ის მიერ გავრცელებულ განცხადებაში.

საქმეზე გამოძიება სისხლის სამართლის კოდექსის 338-ე მუხლის მეორე ნაწილის "ბ" ქვეპუნქტით მიმდინარეობს. ამ მუხლით, მოხელის ან მასთან გათანაბრებული პირის მიერ დიდი ოდენობის ფულის მოთხოვნა, რათა ამ მან განახორციელოს რაიმე ქმედება მიზნის მისაღწევად, ისჯება თავისუფლების აღკვეთით შვიდიდან თერთმეტ წლამდე ვადით.