რუსეთიდან 60 ამერიკელი დიპლომატის გაძევებასა და პეტერბურგში აშშ-ს გენერალური საკონსულოს დახურვას სახელმწიფო დეპარტამენტი გამოეხმაურა. დეპარტამენტის პრეს-სპიკერმა, ჰიზერ ნოიერტმა რუსეთის საპასუხოდ გამართულ ბრიფინგზე, საქართველოში რუსეთის ინტერების სექციის თანამშრომლის გაძევებაზეც ისაუბრა. სახელმწიფო დეპარტამენტის წარმომადგენელმა აღნიშნა, რომ თბილისის ეს ნაბიჯი მნიშვნელოვანია:

"28 ქვეყანა გაერთიანდა და დღეისათვის უკვე 153 რუსი დიპლომატია გაძევებული სხვადასხვა ქვეყნიდან. საქართველო უკანასკნელი ქვეყანაა, რომელიც ამ ძალისხმევაში შემოგვიერთდა და მათ განაცხადეს, რომ 1 რუს ჯაშუშს აძევებენ, რაც მნიშვნელოვანია, რადგან საქართველო რუსეთის მეზობელი ქვეყანაა".

ჰიზერ ნოიერტის თქმით, ელჩი ჯონ ჰაცმანი რუსეთის საგარეო საქმეთა სამინისტროში დაიბარეს და გასცეს განკარგულება, 48 საათში დაიხუროს აშშ-ს საკონსულო სანქტ-პეტერბურგში:

"მინდა აღვნიშნო, რომ ნებისმიერი სამაგიეროს გადახდას ამერიკის შეერთებული შტატების მიმართ, განვიხილავთ და შესაბამის პასუხს გავცემთ".

სკრიპალის საქმესთან დაკავშირებით, რუსეთის საგარეო საქმეთა მინისტრის სერგეი ლავროვის განცხადებით, ისინი იმდენივე ამერიკელ დიპლომატს დაითხოვენ, რამდენიც აშშ-დან გამოაძევეს. მათივე გადაწყვეტილებით, მოსკოვში ამერიკის საელჩოს 58 და პეტერბურგის გენერალური საკონსულოს 2 თანამშრომელი პერსონა ნონ-გრანტად გამოცხადდება. მათ რუსეთის დასატოვებლად დრო 5 აპრილამდე აქვთ.

ყოფილი რუსი ჯაშუში სერგეი სკრიპალი და მისი შვილი იულია, ბრიტანეთის ქალაქ სოლსბერიში 4 მარტს ნერვო-პარალეპტიკური ნივთიერებით მოწამლეს. ისინი ამ დრომდე მძიმე მდგომარეობით საავადმყოფოში არიან. ბრიტანეთის ოფიციალური პოზიციით, საქმეში რუსეთი მონაწილეობს.