დიდ ბრიტანეთში ქალაქ სოლსბერიში მოწამლული ყოფილი რუსი ჯაშუშის სერგეი სკრიპალის შვილი, იულია სკრიპალი გონზე მოვიდა და მას უკვე საუბარი შეუძლია. ინფორმაციას ამის შესახებ BBC ავრცელებს.

სოლსბერის საავადმყოფოს ექიმების ცნობით, იულია სკრიპალის ჯანმრთელობის მდგომარეობა სწრაფად უმჯობესდება, პაციენტის მდგომარეობა აღარ არის კრიტიკული.

"იულია სკრიპალის მკურნალობამ დადებითი შედეგი გამოიღო. ჩვენ ვაგრძელებთ კვალიფიციური სამედიცინო მომსახურებას სადღეღამისო რეჟიმში", - ამბობს სკრიპალების მკურნალი ექიმი, კრისტინ ბლანშარდი.

რაც შეეხება იულია სკრიპალის მამას, სერგეი სკრიპალს, მისი ჯანმრთელობის მდგომარეობას ექიმები კვლავ სტაბილურად მძიმედ აფასებენ. სერგეი და იულია სკრიპალები, 4 მარტს ქალაქ სოლსბერიში ნერვო-პარალეპტიკური ნივთიერებით მოწამლეს.

ექიმების ცნობით, ჯერჯერობით უცნობია თუ როგორ გავლენას იქონიებს მოწამვლის ფაქტი პაციენტის ჯანმრთელობაზე გრძელვადიან პერსპექტივაში. 22 მარტს საავადმყოფოდან გაწერეს პოლიციის სერჟანტი ნიკ ბეილი, რომელიც პირველად მიუახლოვდა დაშავებულებს.

28 მარტს პოლიციამ განაცხადა, რომ მომწამვლელი ნივთიერების ყველაზე დიდი კონცენტრაცია სკრიპალის საცხოვრებელი სახლის, შესასვლელი კარის სახელურზე იყო დატანილი. პოლიციის ცნობით, გაზი "ნავიჩოკი" არეული იყო გაურკვეველ სითხეში და ამგვარი მეთოდით გადაიტანეს კარის სახელურზე.

ბრიტანეთის პრემიერ-მინისტრმა, ტერეზა მეიმ 4 მარტს მოწამლული სკრიპალის და მისი შვილის მოწამვლის საქმეში რუსეთი დაადანაშულა. განცხადებიდან მალევე მეიმ თქვა, რომ ქვეყნიდან 23 რუს დიპლომატს გააძევებდა. ბრიტანეთის გადაწყვეტილებას შეუერთდა აშშ და ევროკავშირის წევრი სახელმწიფოების უმეტესობა. ამ დროისთვის, სხვადასხვა ქვეყნებიდან გაძევებული რუსი დიპლომატების რიცხვი 150 ადამიანს გაუტოლდა. რუსეთი ბრალდებები უარყო და აშშ-ს 60 დიპლომატი გააძევა.