თურქეთის პრეზიდენტის, რეჯეპ ტაიპ ერდოღანის განცხადებით, მან გააგზავნა დაზვერვის სამსახურის უფროსი ერაყელ კოლეგებთან შესახვედრად, რათა დააზუსტოს დეტალები იმ პოლიტიკური პროცესის, რომელიც ერაყის ჩრდილოეთ პროვინცია სინჯარში მიმდინარეობს. ამის შესახებ ინფორმაციას ალჟაზირა ავრცელებს.

ანკარის პოზიციით, აუცილებელია რეგიონი და მასში მდებარე სამხედრო ბაზა დატოვოს ქურთების მშრომელთა პარტიის წარმომადგენლებმა, რომლებიც ტერორისტებად არიან შერაცხულები თურქეთის სახელმწიფოს მიერ. მათ მაგივრად ტერიტორია უნდა დაიკავოს ერაყის ცენტრალურმა ხელისუფლებამ.

ერდოღანის თქმით, თუ ერაყის ხელისუფლება ოპერაციას ეფექტურად ვერ ჩაატარებს მისი ქვეყანა "გასაკეთბელს გააკეთებს''. თურქეთის სახელმწიფო უკვე ათწლეულებია ებრძვის ქურთების შრომელთა პარტიას, რომელიც თავის მხრივ სისტემატიურად ახორციელებს ტერორისტულ აქტებს თურქეთის დიდ ქალაქებში.

ერდოღანისა და მისი ხელისუფლებისთვის მიუღებელია ამ ორგანიზაციის მიერ იმ პროვინციის კონტროლი და სამხედრო ბაზების ყოლა, რომელიც თურქეთისა და ერაყის საზღვარზე მდებარეობს.