თბილისის სახელმწიფო უნივერსიტეტი განმარტავს თუ რატომ წარადგინეს პოეტი დავით მაღრაძე ლიტერატურის დარგში ნობელის პრემიაზე.

უნივერსიტეტის რექტორის გიორგი შარვაშიძის განცხადებით, დავით მაღრაძე ნობელის პრემიაზე წარდგენილია, როგორც თსუ-ს კურსდამთავრებული და ქართული უნივერსიტეტის საზოგადოების გამგეობის წევრი.

"დავით მაღრაძე თანამედროვე ქართული ლიტერატურის ერთ-ერთი გამორჩეული სახეა. ქართველი პოეტის ლიტერატურული მოღვაწეობა გასული საუკუნის 90-იანი წლებიდან იწყება. მისი პოეტური ნაშრომები მსოფლიოს რამდენიმე ენაზე ითარგმნა (გერმანულ, ინგლისურ, იტალიურ, თურქულ, უნგრულ ენებზე და სხვა)", - ნათქვამია განცხადებაში.

დავით მაღრაძე არის საქართველოს სახელმწიფო ჰიმნის ავტორი, რისთვისაც 2005 წელს მას გადაეცა ოქროს ფრთა. მაღრაძეს სხვადასხვა დროს მიღებული აქვს შემდეგი ჯილდოები:

  • იტალიის პრეზიდენტის ჯილდო;
  • სალვატორე კუაზიმოდოს საერთაშორისო პრიზი ლიტერატურის დარგში განსაკუთრებული წვლილისთვის;
  • "ჯაკომო ლეოპარდის" პირველი პრიზი და ოქროს მედალი;
  • იტალიის სახელმწიფო პრიზი "ანასილაოსი";
  • რომის პაპის ბენედიქტ XVI ევროპის საერთაშორისო მედალი კრებულისთვის Salve;
  • მსოფლიოს პოეზიის აკადემიის წევრის სერტიფიკატი;
  • "დონ ლუიჯი დილიეგროს" საერთაშორისო პრემიის ლაურეატი და სხვა.

მაღრაძე ნობელის პრემიაზე 2011 წელსაც იყო წარდგენილი. სხვადასხვა დროს იყო ჟურნალ ცისკრისა და გაზეთ ქომაგის მთავარი რედაქტორი. ასევე, იყო პარლამენტის წევრი.