შიდა ქართლში ე.წ. საზღვრის უკანონო კვეთის ბრალდებით ორი პირი დააკავეს. ამის შესახებ ინფორმაცია On.ge-ს სახელმწიფო უსაფრთხოების სამსახურშიც დაუდასტურეს. სუს-ში ამბობენ, რომ უკვე ამოქმედებულია ცხელი ხაზი, ინფორმირებულია ევროკავშირის სადამკვირვებლო მისია და მიმდინარეობს ინფორმაციის გადამოწმება.

რადიო თავისუფლების ინფორმაციით, დაკავებულები არიან გორის მუნიციპალიტეტის სოფელ ახალუბნის მაცხოვრებლები, იოსებ გუნდიშვილი და დავით გერკეული. ამავე გამოცემის ცნობით, საოკუპაციო ძალების წარმომადგენლებმა ისინი ახალუბანთან მოსაზღვრე სოფელ აძვში მდებარე სოფლის ეკლესიასთან დააკავეს. იოსებ გუნდიშვილმა და დავით გერკეულმა სოფლის სალოცავთან ახლოს მანქანა დატოვეს, რითიც გადაადგილდებოდნენ. ამჟამად პოლიცია აღნიშნულ ავტომანქანას ამოწმებს.

სოფელი აძვი გორიდან 22 კილომეტრში, ახალუბნის თემში, შიდა ქართლის ვაკეზე მდებარეობს.