ოკუპირებულ ცხინვალში დაღუპულ არჩილ ტატუნაშვილის ცხედარს ლევან სამხარაულის სახელობის სასამართლო ექსპერტიზის ეროვნულ ბიუროში ჩაუტარდება ექსპერტიზა, რის შემდეგაც გადაასვენებენ ოჯახში, წილკანში. ამის შესახებ On.ge-ს შერიგების საკითხებში სახელმწიფო მინისტრის აპარატში განუცხადეს.

არჩილ ტატუნაშვილის ცხედარი საქართველოს ხელისუფლებას ცოტა ხნის წინ, ერგნეთში, რუსეთის ფედერაციაში ჩატარებული ექსპერტიზის შედეგებით, წითელი ჯვრის მისიის დახმარებით გადასცეს. ცხედარი უკვე საქართველოს ხელისუფლების მიერ კონტროლირებად ტერიტორიაზეა.

ოჯახი უკვე 26 დღეა ელოდება არჩილ ტატუნაშვილის ცხედარს დე ფაქტო ხელისუფლებისგან. ტატუნაშვილი თითქმის ერთი თვის წინ, 22 თებერვალს ცხინვალის ციხეში გარდაიცვალა.