სამი არასამთავრობო ორგანიზაცია: საქართველოს დემოკრატიული ინიციატივა (GDI), დემოკრატიისა და უსაფრთხო განვითარებისა ინსტიტუტი (IDSD) და საერთაშორისო გამჭირვალობა - საქართველო (TI) უფლებადამცველ ზვიად დევდარიანის მისამართით გამოთქმულ სექსუალური შევიწროვების ბრალდებებს ეხმაურება.

განცხადებაში ვკითხულობთ, რომ არასამთავრობოები სრულ სოლიდარობას და თანადგომას უცხადებენ იმ ქალებს, რომლებიც თავს სექსუალური ძალადობის ან შევიწროების მსხვერპლად მიიჩნევენ. საქართველოს დემოკრატიული ინიციატივა ყველა მათგანს, საკუთარი უფლებების დასაცავად, უფასო იურიდიული დახმარებას და სამართლებრივ მხარდაჭერას სთავაზობს, მათ შორის აღნიშნული საქმის წარმოების პროცესში.

"ჩვენი შეფასების საგანს არ წარმოადგენს გახმაურებული ისტორიების ნაწილი, რომელიც საკუთარი შინაარსით ადამიანის პირადი ცხოვრებით დაცულ სფეროს ფარგლებში ექცევა და ქცევის ზნეობრიობისა და მორალურობის შეფასების კატეგორიას განეკუთვნება, რადგან გვწამს, რომ ადამიანის ფუნდამენტური უფლებაა, თავად გადაწყვიტოს, რა არის მისთვის მორალურად მისაღები და რა - მიუღებელი. თუმცა როდესაც ადამიანის ქცევა სხვათა უფლებებისა და თავისუფლებების მიმართ უპატივცემულობაში გამოიხატება, ბუნებრივია, ის ყოველთვის მოექცევა ჩვენი მკაცრი კრიტიკის ქვეშ", - ვკითხულობთ განცხადებაში.

განცხადებაში ნათქვამია, რომ ადამიანის უფლებათა საკითხებზე მომუშავე არასამთავრობო ორგანიზაციებს ორმაგ პასუხისმგებლობას აკისრებს ის ფაქტი, რომ თავად არასამთავრობო სექტორს შორის ვერ მოხერხდა მსგავსი მოვლენების პრევენცია.

"ახლა მნიშვნელოვანია, რომ ბოლო მოვლენები, ჩვენი საზოგადოებისთვის ძლიერ ბიძგად იქცეს ქალთა მიმართ სექსუალური ძალადობისა და შევიწროების წინააღმდეგ ბრძოლაში და აღნიშნულ თემაზე დუმილის დასაძლევად მნიშვნელოვანი გარდატეხის მომტანი აღმოჩნდეს, რადგან სამწუხაროდ პრობლემა გაცილებით მასშტაბურია", - ვკითხულობთ განცხადებაში.

არასამთავრობოები ხაზს უსვამენ პრევენციული და საგანმანათლებლო ღონისძიებების აუცილებლობას, რომლის განხორციელებაშიც მნიშვნელოვანი როლი სამოქალაქო საზოგადოებას უკავია.

ქალთა მოძრაობამ რამდენიმე დღის წინ ზვიად დევდარიანი სექსუალურ შევიწროების 10-მდე შემთხვევაში დაადანაშაულა.