საპარლამენტო უმცირესობა საზოგადოებრივი მაუწყებლის სამეურვეო საბჭოს კანდიდატად ნინია კაკაბაძეს ასახელებს. ამის შესახებ On.ge-ს უმცირესობის ლიდერმა, ოთო კოხიძემ განუცხადა.

საზოგადოებრივი მაუწყებლის სამეურვეო საბჭოს კანდიდატად სახალხო დამცველმა სიდას აღმასრულებელი დირექტორი, ზვიად დევდარიანი დაასახელა, აჭარის უმაღლესმა საბჭომ კი - აჭარის მთავრობის ყოფილი მრჩეველი, ბესიკ ლილუაშვილი.

ამ ეტაპამდე საკუთარი კანდიდატი არ დაუსახელებია ქართულ ოცნებას.

კანდიდატის წარდგენის წესი

რამდენიმე თვეში სამეურვეო საბჭოში უფლებამოსილება ეწურებათ: აჭარის უმაღლესი საბჭოს მიერ დასახელებულ, გიორგი კოხრეიძესა და საპარლამენტო უმრავლესობის მიერ დასახელებულ გრიგოლ გოგელიასა და სახალხო დამცველის მიერ წარდგენილ მარინა მუსხელიშვილს. საბჭო საკუთარი სურვილით რამდენიმე თვის წინ დატოვა უმცირესობის მიერ დასახელებულმა სულხან სალაძემ. სწორედ მათ შესაცვლელადაა კონკურსი გამოცხადებული და კანდიდატებსაც იგივე სუბიექტები წარუდგენენ პარლამენტს.

სალაძის შემცვლელი საბჭოში ორწლიანი ვადით აირჩევა, დანარჩენი სამი კი ექვსწლიანით.