რუსთავი 2-ის ინფორმაციით, NATO-ს გენერალური მდივანი, იენს სტოლტენბერგი აცხადებს, რომ ჩრდილოატლანტიკური ალიანსი აღიარებს საქართველოს მიერ მიღწეულ პროგრესს და აგრძელებს ჩვენი ქვეყნის მხარდაჭერას. მისი თქმით, საქართველოსა და უკრაინასთან, როგორც უახლოეს პარტნიორებთან მუშაობა გრძელდება:

"ეს სამიტი კიდევ ერთხელ აჩვენებს, რომ ნატოს კარი რჩება ღია. ჩვენ ვართ პროცესში, როდესაც 28 წევრიდან 29-ს მივაღწევთ, როდესაც მონტენეგრო საბოლოოდ შემოგვიერთდება. ჩვენ ასევე ვმუშაობთ საქართველოსთან და უკრაინასთანაც, როგორც უახლოეს პარტნიორებთან. როდესაც ვსაუბრობთ საქართველოზე, ის არის ჩვენი აპლიკანტი ქვეყანა. ჩვენ ვმუშაობთ მათთან, მხარს ვუჭერთ ძალისხმევას, რომელიც შეიარაღებული ძალების მოდერნიზებასა და რეფორმებზეა მიმართული, რომ საბოლოო ჯამში მიუახლოვდნენ ნატოს სტანდარტებს".

სტოლტენბერგმა აღნიშნა, რომ ბოლო სამიტზე საქართველოს არსებითი პაკეტი მიანიჭეს, რის შემდეგაც მისი იმპლემენტაციისთვის მუშაობენ. მისი თქმით, ნატო არა მხოლოდ რჩევებს აძლევს საქართველოს, არამედ მისი წარმოუდგენლობა ჩამოდის ხოლმე ჩვენს ქვეყანაში:

"გავხსენით საწვრთნელი ცენტრი საქართველოში, რაც ძალიან ძლიერი სიგნალია, რომ ჩვენ წინ მივიწევთ თანამშრომლობისა და საქართველოს მხარდაჭერის საკითხში. ჩვენ მივესალმებით პროგრესს, რომელსაც საქართველომ მიაღწია და გავაგრძელებთ მათ მხარდაჭერას. ჩვენ გვექნება შეხვედრა ნატო-საქართველოს კომისიის ფარგლებში, მინისტრების დონეზე, სადაც კიდევ გამოვუცხადებთ საქართველოს ძალისხმევის მხარდაჭერას".

ნატოს გენერალური მდივნის განმარტებით, ნებისმიერ ერს აქვს უფლება თავად აირჩიოს საკუთარი მომავალი, მათ შორის აირჩიოს რომელი ორგანიზაციის წევრობა სურს:

"ეს ეხება საქართველოს, უკრაინასაც და ნებისმიერ ქვეყანას. თუ საქართველოს, უკრაინას ან რომელიმე სხვა ევროპულ ქვეყანას სურს იყოს ნატოს წევრი, გადაწყვეტილება ამ თემაზე მხოლოდ ამ კონკრეტულმა და ალიანსის წევრმა ქვეყნებმა უნდა მიიღონ. სხვას არავის შეუძლია პროცესში ჩარევა".

ნატოს სამიტი, რომელსაც საქართველოს პრეზიდენტთან ერთად რამდენიმე მინისტრი და უშიშროების საბჭოს მდივანი იმყოფება, პოლონეთის დედაქალაქში დღეს დაიწყო. მსოფლიოს სხვადასხვა ქვეყნის ლიდერთან ერთად ვარშავაში იმყოფება აშშ-ს პრეზიდენტი ბარაკ ობამა. მნიშვნელოვან შეხვედრების გამართვას გეგმავს ვარშავაში მყოფი თავდაცვის მინისტრი, თინა ხიდაშელი.