ევროკავშირი და საქართველო ორმხრივი თანამშრომლობის ახალ, უმაღლესი დონის ფორმატზე გადადიან. ამის შესახებ საქართველოს პრეზიდენტ, გიორგი მარგველაშვილსა და ევროკომისიის პრეზიდენტ, ჟან-კლოდ იუნკერის შეხვედრის დასრულების შემდეგ გახდა ცნობილი.

საქართველოს პრეზიდენტის ადმინისტრაციის მიერ გავრცელებული განცხადების მიხედვით, ურთიერთობების ახალი ეტაპი დარგობრივი თანამშრომლობის უმაღლეს ფორმატზე გადასვლას გულისხმობს.

მხარეებმა აღნიშნეს, რომ ევროკომისია და საქართველოს ხელისუფლება აქტიურად თანამშრომლობს სხვადასხვა სფეროში. ამ მიმართულებით, გასული წელი დინამიკური პროგრესით გამოირჩეოდა.

საქართველოს პრეზიდენტის შემდეგ, ჟან-კლოდ იუნკერი საქართველოს დელეგაციას გაფართოებული შემადგენლობით შეხვდა.

შეხვედრაზე განსაკუთრებული ყურადღება დაეთმო საოკუპაციო რეჟიმის ბოლოდროინდელ აგრესიულ ქმედებებს, მხარეებმა შეშფოთება გამოთქვეს ოკუპირებულ ცხინვალში საქართველოს მოქალაქის ტრაგიკული სიკვდილისა და ორი მოქალაქის დაკავების გამო.

მხარეებმა ვიზალიბერალიზაციის პროცესზე გაამახვილეს ყურადღება.საქართველოს პრეზიდენტის განცხადებით, ხელისუფლება გამოთქვამს მზადყოფნას, გადაიდგას ყველა საჭირო ნაბიჯი პარტნიორებთან ერთად უვიზო მიმოსვლის პროცესში გართულებების თავიდან ასაცილებლად.