4 პოლიციელი ემსხვერპლა რამდენიმე საათის წინ, ადგილობრივი დროით საღამოს 9 საათზე, პოლიციელებზე თავდასხმას დალასში, აშშ-ში. ABC News-ის ინფორმაციით, შემთხვევა იმ დროს მოხდა, როცა მოქალაქეები დალასის ცენტრში პოლიციის წინააღმდეგ აქციას მართავდნენ. აქციის მიზეზი კი ორ სხვადასხვა ქალაქში გუშინ დაკავებისას პოლიციის მიერ ორი შავკანიანის მკვლელობა იყო. მოქალაქეები პოლიციელთა მიერ შავკანიანების მიმართ ძალადობას აპროტესტებდნენ.

ამერიკული მედიის ინფორმაციით, პოლიციელებს ცეცხლი ორმა სნაიპერმა გაუხსნა, მათი მიზანი კი რაც შეიძლება მეტი პოლიციელის მოკვლა იყო. შემთხვევის შედეგად 7 პოლიციელი და 1 სამოქალაქო პირი დაიჭრა. პოლიციამ უკვე დააკავა 1 ეჭვმიტანილი, მეორე ეჭვიმატნილზე კი ძებნაა გამოცხადებული.

თავდასხმის გამო დალასის ცენტრი პარალიზებულია, არ მოძრაობს საზოგადოებრივი ტრანსპორტი.

მოქალაქეებმა ინტსაგრამზე, ფეისბუკსა და ტვიტერზე გამოაქვეყნეს ინციდენტის დროს გადაღებული ფოტოები და ვიდეოები, სადაც დალასის ქუჩებში ქაოსი და პანიკაა აღბეჭდილი.

დალასის მერმა მოქალაქეებს მოუწოდა, თავი შეიკავონ ქალაქის ცენტრში თავდასხმის მიმდებარე ტერიტორიაზე გადაადგილებისგან. უბერის ტაქსები მოქალაქეებს მიმდებარე ტერიტორიიდან უფასოდ გადაადგილებას სთავაზობენ.