ჰოლივუდის ვარსკვლავი ლუპიტა ნიონგო ოსკარის დაჯილდოებაზე სცენაზე კუმაილ ნანჯიანთან ერთად გამოჩნდა. მსახიობმა ერთ-ერთი ნომინაციის წარდგენისას აუდიტორიასა და მაყურებლებს შთამაგონებელი ტექსტით მიმართა. ჰოლივუდის ვარსკვლავების მთავარი თემა ემიგრანტები და მათი ოცნებები იყო. ლუპიტა ნიონგომ თავის სიტყვაში აღნიშნა, რომ ამერიკა ოცნებების ქვეყანაა და ყველა მეოცნებემ წარმატების მისღწევად დაუღალავად უნდა იშრომოს.

"ჩვენ ორივე ემიგრანტები ვართ. მე კენიელი ვარ... და ყველა თქვენგანის მსგავსად, ვინც დარბაზში ზიხართ და ვინც ტელეეკრანებიდან გვიყურებთ, ჩვენც მეოცნებეები ვართ. ჩვენ გავიზარდეთ ოცნებებით, რომ ერთ დღეს კინოში ვიმუშავებდით. ოცნებები როგორც ჰოლივუდის, ისე ამერიკის მთავარი დასაყრდენია", - თქვა ლუპიტა ნიონგომ.

"მოგმართავთ ყველა მეოცნებეს, ჩვენ თქვენს გვერდით ვართ", - დაამატა კუმაილ ნანჯიანმა.

ლუპიტა ნიონგოსა და კუმაილ ნანჯიანის სიტყვა დონალდ ტრამპის საემიგრაციო პოლიტიკის საპასუხოდ გაჟღერდა. შეგახსენებთ, რომ დონალდ ტრამპს სპეციალური სახელმწიფო პროგრამის, DACA-ს გაუქმება სურს და ამ თემაზე სხვადასხვა სახელმწიფო უწყებები მუშაობენ.