შინაგან საქმეთა მინისტრი გიორგი გახარია ამბოს, რომ მისთვის უცნობია როდის მოხერხდება არჩილ ტატუნაშვილის ცხედრის გადმოსვენება, თუმცა ამ საკითხში პატრიარქის ჩართულობაზე იმედებს ამყარებს. ამის შესახებ მინისტრმა საზოგადოებრივი მაუწყებლის ეთერში ისაუბრა.

"დიდი მადლობა უნდა გადავუხადოთ უწმინდესს, რომელიც დროულად ჩაერთო ამ სამწუხარო, ტრაგიკული მოვლენის მოგვარებაში. ჩვენ დიდ იმედს ვამყარებთ მის ჩართულობაში"

მინისტრის თქმით, ტატუნაშვილის ცხედრის გადმოსვენება ახლო პერიოდში მოხდება, თუმცა კონკრეტულ ვადას ვერ დაასახელებს.

22 თებერვალს ცხინვალის ციხეში გარდაცვლილი საქართველოს მოქალაქის არჩილ ტატუნაშვილის ცხედრის გადმოსვენებას ქართული მხარე უშედეგოდ ელოდება. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა.

2 მარტს, საქართველოს მართლმადიდებელი ეკლესიის კათოლიკოს პატრიარქმა, ილია მეორემ რუსეთის პატრიარქს ტატუნაშვილის ცხედრის გადმოსვენებისათვის დახმარების თხოვნით მიმართა.

ილია II-ის თხოვნას რუსეთის პატრიარქმა კირილემ დღეს 4 მარტს უპასუხა. საქართველოს საპატრიარქოს მიერ გავრცელებულ განცხადებაში ნათქვამია, რომ პატრიარქი კირილე ეცდება ცხედრის გადაცემის პროცესი მოკლე დროში განხორციელდეს.