დემოკრატიული მოძრაობის ლიდერი ნინო ბურჯანაძე მიიჩნევს, რომ ოკუპირებული სამხრეთ ოსეთის რეგიონის ციხეში არჩილ ტატუნაშვილის გარდაცვალების მიზეზი საქართველოს არასწორი საგარეო პოლიტიკაა. ამის შესახებ მან, ტელეკომპანია იბერიას ეთერში ისაუბრა.

"თავი და თავი ამ პრობლემის არის ხელისუფლების უსუსურობა და სამწუხარო რეალობაა ის, რომ თუ ჩვენ რეალური პოლიტიკა არ შევცვალეთ, ასეთი ტრაგედიები პერიოდულად მოხდება"

ბურჯანაძეს მიაჩნია, რომ საქართველოს ხელისუფლება ყველაფერს არ აკეთებს ტატუნაშვილის ცხედრის გადმოსასვენებლად და რეალურ შედეგის მიღწევა მხოლოდ რუსეთთან მოლაპარაკებით არის შესაძლებელი.

"აბაშიძემ დაურეკა კარასინს? ჩვენმა პრემიერმინისტრმა დაურეკა რუსეთის პრემიერმინსიტრს და თხოვა ამ პრობლემის მოგვარება? პატრიარქი თუ აკეთებს იმას, რომ იღებს კალამს ხელში და წერს წერილს და თავის თანატოლი რანგის ადამიანს რუსეთში, რუსეთის პატრიარს, იგივე უნდა გააკეთოს ჩვენმა ხელისუფლებამ. ამას ქვია ყველაფერს ვაკეთებ და არა ის, რომ მიხვიდე და პირველკლასელი უფროსკლასელის მიერ გალახული ბავშვივით საერთაშორისო თანამეგობრობას მიმართო, რომ არიქა მიშველეო."

გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა. საქართველოს ხელისუფლება ტატუნაშვილის გარდაცვალებაზე პასუხისმგებლობას საოკუპაციო რეჟიმს და რუსეთის ფედერაციას აკისრებს.