გერმანიის კანცლერი ანგელა მერკელი აცხადებს, რომ უკრაინაში რუსეთის ქმედებებმა, დასავლეთის მიმართ ნდობის შესუსტება გამოიწვია.

"საერთაშორისო კანონმდებლობა და საზღვრების ურღვევობა კითხვის ნიშნის ქვეშ დადგა, რამაც ნატოს მიმართ ნდობის დაკარგვა გამოიწვია" - განაცხადა გერმანიის კანცლერმა.

მერკელის თქმით, ვარშავის სამიტზე ნატოს ლიდერების შეხვედრა ემთხვევა პერიოდს, როდესაც ევროპაში თავდაცვის და უსაფრთხოების მხრივ სიტუაცია მკვეთრადაა შეცვლილი. გერმანიის კანცლერმა ეს ვითარება სირიაში, ირანსა და ლიბიაში შექმნილ ქაოტურ სიტუაციასაც დაუკავშირა.

ანგელა მერკელმა დასძინა, რომ რუსეთმა ევროპის აღმოსავლეთით სერიოზული პრობლემები შექმნა, რამაც ნატოს მფარველობის ქვეშ გარანტირებული უსაფრთხოების რწმენა შეარყია. მისი თქმით, დასავლეთმა რუსეთთან საუბარი უნდა განაგრძოს.