გაეზრდება თუ არა ბორჯომის მერს, ლევან ლიპარტიას ხელფასი ჯერ ისევ უცნობია. მერი ამბობს, რომ თანახმაა გაზრდილ ხელფასზე უარი თქვას, თუ საკრებულო სხვა თანამშრომლების საშტატო ნუსხას მხარს დაუჭერს. ამის შესახებ ლიპარტია On.ge-ს ესაუბრა.

მისი თქმით, ბორჯომის საკრებულომ მისი და მერიის სხვა თანამშრომლების ხელფასების გაზრდას მხარი დაუჭირა, თუმცა დოკუმენტს ხელს ამ დრომდე არ აწერენ. ის ამბობს, რომ ამ მიზეზით, მზადაა საკრებულოს ახალი დოკუმენტი გადაუგზავნოს, სადაც მისი ხელფასი აღარ გაიზრდება.

ამავდროულად, ის On.ge-ს იგივე ფაქტზე განსხვავებულ ინფორმაციას აწვდის. მისი თქმით, ხელფასის გაზრდაზე უარი მალევე, მას შემდეგ თქვა, რაც ბორჯომის საკრებულომ მის მიერ გაგზავნილი საშტატო ერთეულების სახელფასო ანაზღაურება არ დაამტკიცა.

"შევამცირე ჩემი ხელფასი იმის გამო, რომ სხვა თანამშრომელი არ მინდოდა დაზარალებულიყო", - განმარტა მან.

კითხვაზე - რატომ გადაწყვიტა თანამდებობაზე არჩევიდან რამდენიმე თვეში ხელფასის გაზრდა - ოთხი თვის არჩეული მერი ასე პასუხობს:

"მაშინ სხვა კანონი იყო, მაშინდელ გამგებელს გაცილებით მეტი ჰქონდა ანაზღაურება დანამატის გათვალისწინებით. კანონის მიხედვით, 3 500 ლარი კი არა გაცილებით მეტად შეიძლებოდა გაზრდა იქედან გამომდინარე, რომ ამის საშუალებას იძლეოდა ის დანამატები, რაც გათვალისწინებული იყო", - ამბობს ბორჯომის მერი.

28 თებერვალს ბორჯომის საკრებულოში ფიზიკური დაპირისპირება მოხდა. მერიის თანამშრომლები და საკრებულოს ფრაქცია ქართული ოცნების წევრები უმრავლესობაში მყოფ ოპოზიციური პარტიების წევრებს მას შემდეგ დაუპირისპირდნენ, რაც საშტატო ნუსხა საკრებულოს სხდომაზე არ დაამტკიცეს და არც ხელფასების ზრდას დაუჭირეს მხარი.

დილიდან ბორჯომის საკრებულოსთან პატრულია მობილიზებული. შენობაში არ უშვებდნენ საკრებულოს წევრებს და თანამშრომლებს.

ქართული ოცნების წევრებმა და მათმა მხარდამჭერებმა, ბორჯომის საკრებულოს ოპოზიციონერი თავმჯდომარის, ზაზა ჩაჩანიძის წინააღმდეგ აქციას გამართეს. აქციას ესწრებოდა ბორჯომის მერიც.