სახელმწიფო უსაფრთხოების სამსახურის ინფორმაციით, გალში ინციდენტების პრევენციისა და მათზე რეაგირების მექანიზმის შეხვედრა გაიმართა, რომლის ფარგლებშიც საქართველოს წარმომადგენლებმა ხურჩაში, საოკუპაციო ხაზთან მოკლული გიგა ოთხოზორიას საქმე კიდევ ერთხელ დააყენეს.

"ქართულმა მხარემ საოკუპაციო ძალისა და დე-ფაქტო ხელისუფლების წარმომადგენლებისგან მოითხოვა განზრახ მკვლელობაში ბრალდებული პირი, რათა ის წარსდგეს ქართული მართლმსაჯულების წინაშე, რისთვისაც აუცილებელია აღნიშნული პირის დაკავება ოკუპირებულ ტერიტორიაზე. ცენტრალური ხელისუფლების წარმომადგენლებმა შეხვედრის მონაწილეებს გაუზიარეს საქმის მასალები, კერძოდ დნმ-ის ანალიზის, ბალისტიკური და სასამართო-სამედიცინო ექსპერტიზის შედეგები".

უწყების ცნობით, საუბარი ასევე შეეხო ე.წ. საზღვრის უკანონო კვეთის ბრალდებით საქართველოს მოქალაქეების უკანო დაკავებების ფაქტებსა და ე.წ. ბორდერიზაციის უკანონო პროცესს, რომელიც ოკუპაციის ხაზის ორივე მხარეს მცხოვრებ ადგილობრივ მოსახლეობას მნიშვნელოვან პრობლემებს უქმნის.

ქართულმა მხარემ უკანონო პატიმრობაში მყოფი საქართველოს მოქალაქე, გიორგი ლუკავას გათავისუფლების საკითხიც დააყენა.