თბილისის განვითარების ფონდი დავით აღმაშენებლის გამზირის რეაბილიტაციისთვის დამატებით 9 250 000 ლარს ითხოვს. როგორც თავად აცხადებენ, პროექტისთვის თავდაპირველად გამოყოფილი 21 მილიონი ლარი საკმარისი არ აღმოჩნდა.

თბილისის განვითარების ფონდმა აღმაშენებლის გამზირის რეაბილიტაცია მარჯანიშვილის მოედნიდან მშრალ ხიდამდე მონაკვეთზე 2016 წლის თებერვალში დაიწყო და მაშინ პროექტისთვის 21 მილიონი ლარი გამოიყო. მერიას დაქვემდებარებული თბილისის განვითარების ფონდი განმარტავს, რატომ დასჭირდა საპროექტო თანხის თითქმის 50 პროცენტით გაზრდა:

1. სარეაბილიტაციო შენობები (მათ შორის 45-დან 38 ისტორიულ-კულტურული მემკვიდრეობის ძეგლი) აღმოჩნდა გაცილებით მძიმე ავარიულ მდგომარეობაში, ვიდრე იდენტიფიცირებული იყო შენობებზე სარესტავრაციო-სარეაბილიტაციო სამუშაოების დაწყებამდე. სარესტავრაციო-სარეაბილიტაციო სამუშაოების ზუსტი მოცულობის იდენტიფიცირება, უშუალოდ სამშენებლო სამუშაოების დაწყებამდე შეუძლებელია, როგორც ადგილობრივი, ისე საერთაშორისო გამოცდილების მიხედვით.
2. შენობების მდგომარეობის სიმძიმიდან და ასევე ფასადების მხატვრული ელემენტების წინასწარი შეფასების შერჩევითობიდან გამომდინარე, გაცილებით მეტი მოცულობის სამუშაოები აღმოჩნდა შესასრულებელი, ვიდრე მოცემული იყო საპროექტო გადაწყვეტილებებში (რაც წინასწარ შერჩევით შემოწმდა, იმაზე გაცილებით მეტი აღმოჩნდა ჩასანაცვლებელი, ყველა ვერ აღდგა).
3. შენობების კონსტრუქციული გამაგრების აუცილებლობის და გარანტირებულობის უზრუნველსაყოფად, საჭირო გახდა არამხოლოდ უშუალოდ სარეაბილიტაციო შენობების გამაგრების ჩატარება, არამედ იმავე მისამართზე მდებარე მომიჯნავე და მიჯრით მდგარი შიდა შენობების გამაგრებაც (არაფასადური მხარე) მათი მჭიდრო კავშირის გამო ერთმანეთთან.
4. შენობების ფასადური და სხვა ნაწილების გასუფთავება-დამუშავების დროს, ნალესის ქვეშ აღმოჩნდა მნიშვნელოვანი ისტორიულ-კულტურული და მხატვრული ელემენტები, რომელთა შენარჩუნებაც გათვალისწინებული არ იყო (ვერ იქნებოდა) საპროექტო დოკუმენტაციაში.
5. რამდენიმე სადარბაზოში აღმოჩნდა ისტორიული მოხატულობა, რომელიც შენარჩუნების მიზნით ითხოვს დამატებით სამუშაოებს.
6. საპროექტო დოკუმენტაციით განსაზღვრული მეთოდით შენობების რესტავრაცია ითვალისწინებდა რიგ მისამართებზე შენობების შენარჩუნების მოსინჯვით მეთოდს („დაზუსტდეს ადგილზე“), რამაც უშუალოდ სამუშაოების განხორციელების პროცესში დააზუსტა რამდენიმე შენობის მთლიანი ან/და ნაწილობრივი დაშლა-გადაწყობის აუცილებლობა, რის გარეშეც შეუძლებელი იქნებოდა შენობების შენარჩუნება მათი გამოყენების პირობით.
7. ხშირ შემთხვევაში ვერ მოხერხდა იმ მოცულობით მაღალმხატვრული გაფორმების ელემენტების შენარჩუნება ფასადებზე, რომლებზეც საპროექტო დოკუმენტაციაში შერჩევითი მეთოდით გადამოწმების გზით, მოცემული იყო დავალება რესტავრაციაზე. შენობების ხანდაზმულობის და ფასადების სიღრმისეულად დაზიანების გამო, შემთხვევათა ძალიან დიდ ნაწილში აუცილებელი გახდა ფასადის გაფორმების ელემენტების დიდი ნაწილის გამოცვლა და არა აღდგენა-რესტავრაცია.

გამარტივებული შესყიდვის განსახორციელებლად დოკუმენტაცია თბილისის განვითარების ფონდმა შესაბამის ვებგვერდზე 5 ივლისს გამოაქვეყნა. ფონდი განმარტავს, რომ რეაბილიტაციის განსახორციელებლად კონკურენტიანი ტენდერის გამოცხადება პროცესს გააჭიანურებს, რა დროსაც შეიძლება დაზიანდეს საპროექტო არეალში არსებული ისტორიული შენობები.

ამ დროისათვის, წინადადება განხილვის ეტაპზეა. გადაწყვეტილება 11 ივლისამდე უნდა იქნეს მიღებული.

არსებული გათვლებით, აღმაშენებლის გამზირის რეაბილიტაცია 2016 წლის დეკემბრის ჩათვლით უნდა დასრულდეს. ამჟამად აღმაშენებლის გამზირის აღნიშნული მონაკვეთი მთლიანად გადათხრილია და იქ მცხოვრებ მოსახლეობას გადაადგილება კუსტარულად მოწყობილი გადასასვლელებით უწევს.