თითქმის ორი კვირის წინ, ილონ მასკმა მთელი მსოფლიოს ყურადღება მიიპყრო თავისი Falcon Heavy-ს წარმატებული ტესტირებით. მან კოსმოსში გაუშვა ყველაზე დიდი რაკეტა, თან თავისი კომპანიის, Tesla-ს წითელი მანქანა გაატანა, რომელშიც მძღოლი Starman იჯდა და მარსისკენ აიღო გეზი. ეს ყველაფერი არ არის, მან გაშვებული რაკეტა უკან, მიწაზე წარმატებით დააბრუნა. მასკის ამ რევოლუციურმა ტექნოლოგიამ რაკეტების გაშვების ფასი რამდენიმე ასეული მილიონით გააიაფა.

რა თქმა უნდა, კომპანია SpaceX პირდაპირ ეთერში გადმოსცემდა ამ ეპოქალურ მოვლენას. პირდაპირ ეთერს რამდენიმე მილიონმა ადამიანმა უყურა. გაშვებიდან რამდენიმე დღეშიც კი სოციალური ქსელები წალეკილი იყო დევიდ ბოუის სიმღერების ლინკებით, Roadster-ის ფოტოებით და ყველაფრით, რაც ილონ მასკის Falcon Heavy-ს ეხებოდა.

ილონ მასკმა ესეც არ იკმარა და თავისი მანქანიდანაც გაუშვა პირდაპირი ეთერი. სანამ სიგნალი არ შესუსტდა, შეგეძლოთ მანქანიდან დაგენახათ დედამიწა, რომელსაც Starman უფრო და უფრო შორდებოდა.

სიგნალის დაკარგვის შემდეგ, ყველას გვაინტერესებს მანქანისა და Starman-ის ბედი. წესით, SpaceX-ის სკაფანდრში გადაცმული Starman-ს წითელი მანქანით მარსისკენ უნდა აეღო გეზი, თუმცა, ოდნავი გადაცდომის გამო, ის ასტეროიდული სარტყლისკენ წავიდა. მაგრამ სადარდებელი არაფერია, მას ხომ დევიდ ბოუის სიმღერა აქვს ჩართული და ეკრანზე Don't Panic! აწერია.

არ იდარდოთ. ნასამ თქვენი ცნობისმოყვარეობის დაკმაყოფილებაზე უკვე იზრუნა. საიტი whereisroadster.com სპეციალურად იმისთვის შეიქმნა, რომ კოსმოსური მანქანისთვის თვალის დევნება კომფორტულად შეძლოთ.

საიტის შემქმნელი, ინჟინერი ბენ პირსონი იმდენად აღფრთოვანებული იყო Falcon Heavy-ს გაშვებით, რომ მან საკუთარი გამოთვლები გააკეთა Starman-ის ტრაექტორიისთვის. რა თქმა უნდა, ილონ მასკით აღტაცებამაც დიდი როლი ითამაშა ამ პროექტის განხორციელებაში.

"ძალიან მომწონს, რომ ის [მასკი] უდიდეს რისკებზე მიდის და ისეთ მაგარ რამეებს აკეთებს, რაც თავდაპირველად ყველას შეუძლებელი ეჩვენება. ის მაინც პოულობს გზას და ყველაფერს შესაძლებელს ხდის", - ამბობს პირსონი.

სანამ კიდევ გაგვაოცებს მასკი თავისი გიჟური იდეებით, ჩვენ შეგვიძლია წითელ მანქანას თვალი ვადევნოთ და წარმოვიდგინოთ, რომ მასში დევიდ ბოუია ჩართული. მერე რა, რომ კოსმოსში ხმა არ ისმის.